दुष्काळसदृश परिस्थितीमुळे महावितरण यंत्रणेला ‘हायअलर्ट’; कर्मचाऱ्यांना मुख्यालय न सोडण्याचे सक्त आदेश
थेट WhatsApp वर मिळवा
राज्यात दुष्काळसदृश परिस्थिती असल्याने महावितरण यंत्रणेला ‘हायअलर्ट’ देण्यात आला आहे. वीजपुरवठा सुरळीत ठेवण्यासाठी कर्मचाऱ्यांना मुख्यालय न सोडण्याचे सक्त आदेश दिले आहेत.
स्थैर्य, सातारा, दि. 03 ऑक्टोबर : राज्यात दुष्काळसदृश परिस्थिती निर्माण झाल्याच्या पार्श्वभूमीवर महावितरणने आपल्या तांत्रिक यंत्रणेला ‘हायअलर्ट’ दिला आहे. दुष्काळी परिस्थितीत शासनाच्या उपाययोजनांची प्रभावी अंमलबजावणी करण्यासाठी सर्व अभियंते, यंत्रचालक आणि तारमार्ग कर्मचाऱ्यांना आपले मुख्यालय न सोडण्याचे सक्त आदेश देण्यात आले आहेत.
तांत्रिक कामे आणि वीजपुरवठ्यावर लक्ष
महावितरणचे अध्यक्ष व व्यवस्थापकीय संचालक लोकेश चंद्र यांच्या आदेशानुसार संचालक धनंजय औंढेकर, योगेश गडकरी, सचिन तालेवार आणि राजेंद्र पवार यांनी विविध परिमंडलांना भेटी देऊन परिस्थितीचा आढावा घेतला. कृषिपंपांसह सर्व वर्गवारीतील ग्राहकांना सुरळीत वीजपुरवठा मिळावा, यासाठी आवश्यक तांत्रिक कामे आणि वीजयंत्रणेच्या उपाययोजनांबाबत संबंधित अधिकाऱ्यांना स्पष्ट निर्देश देण्यात आले आहेत.
हयगय केल्यास कारवाईचा इशारा
दुष्काळाच्या काळात वीजपुरवठा सुरळीत राहणे महत्त्वाचे असल्याने कोणत्याही अधिकारी किंवा कर्मचाऱ्याला पूर्वपरवानगीशिवाय मुख्यालय सोडता येणार नाही. वीजपुरवठा खंडित झाल्यास पर्यायी व्यवस्था करून तातडीने दुरुस्तीची कामे हाती घेण्याच्या सूचना आहेत. या कामात हलगर्जीपणा केल्यास शिस्तभंगाची कारवाई केली जाईल, असा इशारा महावितरणने दिला आहे. दरम्यान, जिल्हाधिकारी योगेश कुंभेजकर यांच्याकडून पिकांच्या नुकसानीची पाहणी केली जात आहे.
