तुकाराम मुंढेंचा बनावट प्रोटीन पावडर आणि दारू भेसळ करणाऱ्यांवर दणका; एफडीएची राज्यभरात मोठी कारवाई
थेट WhatsApp वर मिळवा
अन्न व औषध प्रशासनाने राज्यभरात धडक मोहीम राबवत भेसळयुक्त दारू, बनावट प्रोटीन पावडर आणि निकृष्ट अन्नपदार्थांचा मोठा साठा जप्त केला आहे.
स्थैर्य, सातारा, दि. ०३ ऑक्टोबर : अन्न व औषध प्रशासनाचे (FDA) आयुक्त तुकाराम मुंढे यांच्या मार्गदर्शनाखाली एफडीएने राज्यभरात अवैध व बनावट पदार्थांविरोधात जोरदार कारवाईचा बडगा उगारला आहे. जिममध्ये वापरल्या जाणाऱ्या बनावट प्रोटीन पावडर, आहारातील घातक पूरक उत्पादने (Nutraceuticals) आणि भेसळयुक्त दारूची निर्मिती तसेच विक्री करणाऱ्या जोडधंद्यांवर एफडीएच्या पथकांनी थेट छापे टाकले आहेत. या कारवाईत लाखो रुपयांचा संशयास्पद आणि मानवी आरोग्यास घातक असणारा साठा जप्त करण्यात आला आहे.
आरोग्याशी खेळणाऱ्यांवर एफडीएची करडी नजर
तरुणांमध्ये वाढती बॉडीबिल्डिंगची क्रेझ लक्षात घेऊन बाजारात मोठ्या प्रमाणावर मानकांचे उल्लंघन करून बनावट प्रोटीन पावडर विकली जात असल्याच्या तक्रारी एफडीएकडे आल्या होत्या. या पार्श्वभूमीवर मुंढे यांनी विशेष पथके तैनात करून मुंबई, पुणे, ठाणे आणि नाशिकसह राज्यातील विविध शहरांत तपासणी मोहीम राबवली. तपासणीदरम्यान अनेक ठिकाणी लेबलवर चुकीचा मजकूर असणे, मुदत संपलेली उत्पादने विकणे आणि मानकांपेक्षा वेगळे घटक वापरल्याचे निष्पन्न झाले.
परवाने रद्द; कठोर कायदेशीर कारवाईचा इशारा
या धडक मोहिमेत केवळ भेसळयुक्त अन्नपदार्थ आणि बनावट सप्लिमेंट्स जप्त केले गेले नाहीत, तर नियमांचे उल्लंघन करणाऱ्या अनेक आस्थापनांचे परवाने तडकाफडकी निलंबित करण्यात आले आहेत. भेसळयुक्त दारू आणि आरोग्यास घातक ठरणाऱ्या बनावट घटकांची विक्री करणाऱ्यांवर गुन्हे दाखल करण्याची प्रक्रिया सुरू करण्यात आली आहे. नागरिकांच्या जिवाशी खेळणाऱ्यांची अजिबात गय केली जाणार नाही, असा स्पष्ट इशारा आयुक्त मुंढे यांनी दिला आहे.
