फलटणच्या ऐतिहासिक वैभवात पडणार भर; नगरपरिषद आवारात उभारणार ‘महाराणी सईबाई राणीसाहेब’ यांचा सिंहासनाधिष्ठित पुतळा! : रणजितदादांचे निर्देश

फलटणचे ऐतिहासिक महत्त्व जपत नगरपरिषदेच्या आवारात महाराणी सईबाई राणीसाहेब यांचा सिंहासनाधिष्ठित पुतळा उभारण्याचे माजी खा. रणजितसिंह नाईक निंबाळकर यांचे निर्देश. यासह शहरात छत्रपती शिवाजी महाराज, अण्णाभाऊ साठे आणि अहिल्यादेवी होळकर यांच्या पुतळ्यांचेही सादरीकरण संपन्न.

स्थैर्य, फलटण, दि. 7 मे : फलटण शहराला एक मोठा ऐतिहासिक वारसा लाभलेला आहे. हाच वारसा अधिक गडद करणारा एक ऐतिहासिक आणि अत्यंत महत्त्वाचा निर्णय नुकताच घेण्यात आला आहे. फलटण नगरपरिषदेच्या आवारात आता सिंहासनावर विराजमान असलेल्या ‘महाराणी श्रीमंत छत्रपती सईबाई राणीसाहेब’ यांचा भव्य पुतळा उभारण्यात येणार आहे. माजी खासदार रणजितसिंह नाईक निंबाळकर यांनी याबाबतचे स्पष्ट निर्देश दिले असून, लवकरच या पुतळ्याचे काम मार्गी लागणार आहे. यासोबतच शहरात अन्य तीन महापुरुषांच्या पुतळ्यांची उभारणी केली जाणार असून, नुकतेच या सर्व पुतळ्यांच्या उभारणीचे सविस्तर सादरीकरण (प्रेझेंटेशन) आर्किटेक्ट रोहन बळीप यांनी एका विशेष बैठकीत दिले.

ऐतिहासिक निर्णय: महाराणी सईबाई राणीसाहेब यांचा पुतळा उभारणार

या बैठकीतील सर्वात लक्षवेधी आणि फलटणकरांसाठी भावनिकदृष्ट्या महत्त्वाचा मुद्दा म्हणजे महाराणी सईबाई राणीसाहेब यांच्या पुतळ्याची उभारणी. श्रीमंत छत्रपती सईबाई राणीसाहेब यांचे माहेर हे फलटण आहे. त्या छत्रपती शिवाजी महाराजांच्या प्रथम पत्नी आणि स्वराज्यरक्षक श्रीमंत छत्रपती संभाजी महाराज यांच्या मातोश्री होत्या. साहजिकच, छत्रपती संभाजी महाराजांचे फलटण हे ‘आजोळ’ आहे.

इतके दृढ ऐतिहासिक आणि भावनिक नाते असूनही, यापूर्वी कधीही फलटणमध्ये सईबाई राणीसाहेब यांचा पुतळा उभारण्यात आलेला नव्हता. ही ऐतिहासिक उणीव भरून काढत आता हा पुतळा उभारण्याचे निर्देश माजी खासदार रणजितसिंह नाईक निंबाळकर यांनी दिले आहेत. याबाबत ‘पुतळा समिती’ सुद्धा गठीत करण्याची कार्यवाही झाली असून, लवकरच नगरपरिषदेच्या आवारात महाराणी सईबाई राणीसाहेब यांचा सिंहासनाधिष्ठित पुतळा दिमाखात उभा राहील.

पुतळ्यांसाठी राज्यात पहिल्यांदाच विशेष निधी मंजूर:

राज्यामध्ये पहिल्यांदाच फलटण शहरासाठी ‘विशेष बाब’ म्हणून पुतळ्यांच्या उभारणीसाठी राज्य सरकारकडून विशेष निधी देण्यात आला आहे. राज्यात असे दुसरे कुठेही उदाहरण नसून, केवळ माजी खासदार रणजितसिंह नाईक निंबाळकर यांच्या विशेष प्रयत्नांतून व पाठपुराव्यातून फलटणसाठी हा निधी उपलब्ध करून देण्यात आलेला आहे.

शहरात उभारण्यात येणाऱ्या इतर पुतळ्यांचे स्वरूप आणि ठिकाण:

या सादरीकरण बैठकीत शहरात नव्याने उभारल्या जाणाऱ्या इतर तीन पुतळ्यांबाबत सविस्तर माहिती देण्यात आली:

• छत्रपती शिवाजी महाराज यांचा अश्वारूढ पुतळा: शहरात छत्रपती शिवाजी महाराजांचा नवा भव्य अश्वारूढ पुतळा उभारला जाणार आहे. विशेष बाब म्हणजे, महाराजांचा जुना जो पुतळा आहे तो काढला जाणार नसून, नवीन अश्वारूढ पुतळ्याच्या पुढे तो सन्मानाने बसवण्यात येणार आहे.

• लोकशाहीर अण्णाभाऊ साठे यांचा पुतळा: पाचबत्ती चौक ते बारामती चौक रोडवर (सिमेंट रोडची सुरुवात) साहित्यरत्न लोकशाहीर अण्णाभाऊ साठे यांचा पूर्णाकृती पुतळा बसवण्यात येणार आहे. फलटण शहरात अण्णाभाऊंचा पुतळा पहिल्यांदाच बसवला जाणार आहे.

• राजमाता अहिल्यादेवी होळकर यांचा पुतळा: पृथ्वी चौक (राजमाता अहिल्यादेवी होळकर चौक) येथे एका बाजूला (डॉ. आंबेडकर चौकाकडे जाणाऱ्या मार्गावर) पुण्यश्लोक राजमाता अहिल्यादेवी होळकर यांचा पूर्णाकृती पुतळा उभारण्यात येणार आहे.

सर्व पुतळे लवकरात लवकर उभारणार – नगराध्यक्ष समशेरसिंह 

यावेळी नगराध्यक्ष समशेरसिंह नाईक निंबाळकर यांनी ग्वाही दिली की, फलटणमध्ये बसत असलेले हे चारही पुतळे लवकरात लवकर आणि पूर्ण सन्मानाने उभारले जातील. आज चारही पुतळा समित्यांनी जे निर्देश आणि सूचना दिलेल्या आहेत, त्यानुसारच पुतळे बसवण्यात येतील अशी खात्री त्यांनी यावेळी दिली.

मान्यवरांची उपस्थिती:

या महत्त्वपूर्ण बैठकीस प्रमुख उपस्थिती म्हणून माजी खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर, सातारा जिल्हा बँकेचे संचालक श्रीमंत शिवरूपराजे खर्डेकर, आणि स्वराज नागरी सहकारी पतसंस्थेचे चेअरमन अभिजीत नाईक निंबाळकर उपस्थित होते.

तसेच, या बैठकीस सातारा जिल्हा परिषदेचे माजी अध्यक्ष माणिकराव सोनवलकर, ज्येष्ठ नगरसेवक सोमाशेठ जाधव, नगरसेवक अशोकराव जाधव, संदीप चोरमले, रोहित नागटिळे, किरण राऊत, सुदाम (आप्पा) मांढरे, सचिन अहिवळे, राहुल निंबाळकर, माजी नगरसेवक अनुप शहा, फिरोज आत्तार, फलटण पंचायत समितीचे सदस्य विकास नाळे, माजी जिल्हा परिषद सदस्य महादेव पोकळे, ज्येष्ठ नेते भीमदेव बुरुंगले, भाजपा जिल्हा सरचिटणीस जयकुमार शिंदे, व्यापारी महासंघाचे अध्यक्ष डॉ. दोशी, निरगुडी विकास सोसायटीचे चेअरमन युवराज सस्ते, युवा नेते श्रीवल्लभ हेंद्रे, अमोल सस्ते, पै. संजय देशमुख, बाळासाहेब कदम, विधीज्ञ ॲड. ऋषिकेश काशीद, नगरअभियंता रत्नरंजन गायकवाड आणि नगरपरिषद आरोग्य विभाग प्रमुख विनोद जाधव आदी मान्यवर उपस्थित होते.