अल्पवयीन युवतीशी प्रेमविवाह; एकावर बलात्काराचा गुन्हा दाखल

दैनिक स्थैर्य | दि. १६ मार्च २०२३ | फलटण |
अतित (ता. सातारा) येथील एका अल्पवयीन युवतीशी प्रेमविवाह केल्याने तसेच त्यातून तिला दिवस जाऊन मुलगा झाल्याने साखरवाडी (ता. फलटण) येथील इंद्रजित जाधव या युवकावर बलात्काराचा गुन्हा दाखल झाला आहे. या प्रकरणी फलटण ग्रामीण पोलीस ठाण्यात पीडित युवतीने बुधवार, १५ मार्च रोजी तक्रार दाखल केली आहे.

याबाबत अधिक माहिती अशी, अतित (ता. सातारा) येथील एका अल्पवयीन युवतीचे प्रेम साखरवाडी (ता. फलटण) येथील इंद्रजित जाधव या युवकाबरोबर २०२२ मध्ये जुळले होते. त्यातून त्या दोघांनी दि. ६/४/२०२२ रोजी साखरवाडी येथे लग्न केले. त्यानंतर दोघा कुटुंबांच्या सहमतीने ती युवती इंद्रजीत जाधव याचे घरी राहू लागली. तेथे राहत असताना इंद्रजीत जाधव याचेकडून तिला दिवस गेले. त्यानंतर आरोपी इंद्रजित याने साखरवाडी येथे डॉ. काळे मॅडम यांच्याकडे औषधोपचार केल्यानंतर ती युवती अतित तिथे राहत होती. दि. १३ मार्च २०२३ रोजी तिच्या पोटात दुखू लागल्याने सिव्हिल हॉस्पिटल सातारा येथे अ‍ॅडमिट केले असता ती अल्पवयीन असल्याचे समजले. त्यावेळी युवतीने आमचे दोघांचे लग्न प्रेमविवाहातून झाले असल्याचे पोलीस व डॉक्टरांना सांगितले. त्या युवतीची दि. १४ मार्च रोजी प्रसूती होऊन मुलगा झाल्याने व संबंधित युवती अल्पवयीन असल्याने इंद्रजीत जाधव (राहणार साखरवाडी, तालुका फलटण) याच्यावर फलटण ग्रामीण पोलीस बलात्काराचा गुन्हा दाखल झाला आहे.

या प्रकरणी अधिक तपास फलटण ग्रामीण पोलीस ठाण्याचे सपोनि श्री. शिंदे करत आहेत.