हरवलेली बॅग सुरक्षितपणे मूळ मालकिणीला सुपूर्द; राष्ट्रवादीचे नेते नंदकुमार मोरे यांच्या प्रामाणिकपणाचे सर्वत्र कौतुक
थेट WhatsApp वर मिळवा
नरसोबानगर येथील जीवनज्योत हॉस्पिटल परिसरात सापडलेली एक महत्त्वाची बॅग राष्ट्रवादी काँग्रेस (शरदचंद्र पवार) पक्षाचे नेते नंदकुमार मोरे आणि विशाल भागवत यांनी भाजप नेते संजय देशमुख यांच्या मदतीने मूळ मालकिणीला सुखरूप परत केली.
स्थैर्य, फलटण, दि. 24 मार्च : सध्याच्या धावपळीच्या आणि स्वार्थी जगात प्रामाणिकपणा दुर्मिळ होत चालला असताना, फलटणमध्ये एक अत्यंत कौतुकास्पद आणि सकारात्मक घटना समोर आली आहे. नरसोबानगर येथील ‘जीवनज्योत हॉस्पिटल’ परिसरात हरवलेली एक महत्त्वाची बॅग मूळ मालकिणीचा शोध घेऊन त्यांना अत्यंत सुरक्षितपणे परत करण्यात आली आहे. राष्ट्रवादी काँग्रेस पक्ष (शरदचंद्र पवार) चे फलटण तालुक्याचे नेते नंदकुमार मोरे व त्यांचे सहकारी विशाल भागवत यांच्या या प्रामाणिकपणाचे आणि तत्परतेचे सर्वत्र मोठे कौतुक होत आहे.
सविस्तर माहितीनुसार, राष्ट्रवादीचे नेते नंदकुमार मोरे आणि विशाल भागवत यांना नरसोबानगर येथील जीवनज्योत हॉस्पिटल परिसरात एक अनोळखी बॅग बेवारस स्थितीत सापडली. कोणाची तरी महत्त्वाची वस्तू हरवली असावी, या विचाराने त्यांनी त्या बॅगेची पाहणी केली. आतमध्ये पाहिले असता, त्यामध्ये असलेल्या माहितीवरून ती बॅग मालोजीनगर (कोळकी) येथील रहिवासी असलेल्या सौ. संजना चैतन्य रायकर यांची असल्याचे त्यांना समजले.
बॅगेच्या मालकिणीचा पत्ता समजल्यानंतर नंदकुमार मोरे यांनी तातडीने कोळकीचे भाजपाचे युवा नेते संजय देशमुख यांच्याशी संपर्क साधला आणि त्यांना या हरवलेल्या बॅगेबाबत सविस्तर माहिती दिली. संजय देशमुख यांनीही सामाजिक बांधिलकी जपत त्वरित सौ. संजना रायकर यांच्याशी संपर्क साधला आणि त्यांना त्यांची बॅग सुरक्षित सापडल्याचा निरोप दिला.
त्यानंतर सौ. संजना रायकर यांना त्यांची हरवलेली बॅग सन्मानपूर्वक आणि सुरक्षितपणे परत करण्यात आली. आपली हरवलेली बॅग जशीच्या तशी परत मिळाल्याने सौ. रायकर यांनी अत्यंत समाधान व्यक्त करत सर्वांचे मनःपूर्वक आभार मानले.
ही बॅग परत सुपूर्द करताना राष्ट्रवादीचे नेते नंदकुमार मोरे, विशाल भागवत, भाजप युवा नेते संजय देशमुख, रोहित मुळीक, डेव्हिड वाकोडे, गणेश, प्रतीक मोरे आणि यश राठोड आदी मान्यवर उपस्थित होते. राजकीय पक्षांचे हेवेदावे बाजूला ठेवून एका महिलेची अडचण दूर करण्यासाठी राष्ट्रवादी आणि भाजपच्या नेत्यांनी दाखवलेला हा समन्वय आणि प्रामाणिकपणा खऱ्या अर्थाने समाजासाठी प्रेरणादायी ठरला आहे.
