कोरेगावात रविवारपासून ग्रामदैवत श्री भैरवनाथ यात्रेचा उत्साह; सलग सहा दिवस विविध कार्यक्रमांची रेलचेल
कोरेगावचे ग्रामदैवत श्री भैरवनाथ यात्रा अक्षय तृतीयेपासून (१९ एप्रिल) सुरू होत असून, बैलगाड्यांच्या शर्यती, कुस्त्या, रेकॉर्ड डान्स, होम मिनिस्टर आणि लावणीसह विविध कार्यक्रमांची मोठी मेजवानी ग्रामस्थांना मिळणार आहे.
स्थैर्य, कोरेगाव (सातारा), दि. १७ : कोरेगाव येथील ग्रामदैवत श्री भैरवनाथ यात्रा अक्षय तृतीयेच्या शुभमुहूर्तावर म्हणजेच रविवारपासून (ता. १९) सुरू होणार असून, ती पुढील रविवारपर्यंत (ता. २६) मोठ्या उत्साहात पार पडणार आहे. या यात्रेनिमित्त छबिना, बहुरंगी सोंगे, बैलगाड्यांच्या शर्यती, कुस्त्या, राज्यस्तरीय डान्स स्पर्धा, महिलांसाठी होम मिनिस्टर आणि लावणीच्या कार्यक्रमांचे भव्य आयोजन करण्यात आले आहे.
यात्रेतील कार्यक्रमांचे सविस्तर वेळापत्रक खालीलप्रमाणे :
१) पालखी मिरवणूक आणि बहुरंगी सोंगे (रविवार, दि. १९)
अक्षय तृतीयेला रात्री ९ वाजता ‘श्रीं’ची पालखीतून मिरवणूक व छबिना निघणार आहे. यासोबतच कोरेगाव शहर मर्यादित सामूहिक व वैयक्तिक सोंगे काढण्यात येतील. त्यातील उत्कृष्ट सामूहिक सोंगांना अनुक्रमे १७, १५, १३ ते ५ हजारांपर्यंत, तर उत्कृष्ट वैयक्तिक सोंगांनाही ३,३५१ रुपयांपासून पुढे रोख बक्षिसे देण्यात येणार आहेत.
२) भव्य बैलगाडा शर्यती (मंगळवार, दि. २१)
सकाळी ७ वाजता रेणुका मंदिराशेजारी (जुनी फाटी) बैलगाड्यांच्या थरारक शर्यती रंगणार आहेत. विजेत्या बैलगाड्यांना प्रथम क्रमांकासाठी तब्बल १ लाख रुपये, तर इतर विजेत्यांना अनुक्रमे ८१,०८२, ६१,०८२, ५१,०८२ ते १५,०८२ रुपयांपर्यंतची आकर्षक रोख बक्षिसे दिली जाणार आहेत.
३) कुस्त्यांचा जंगी आखाडा (बुधवार, दि. २२)
दुपारी ४ वाजता बाजारपेठ मैदानावर कुस्त्यांचा जंगी आखाडा भरणार आहे. यामध्ये राज्यातील नामांकित मल्ल सहभागी होणार असून विजेत्या मल्लांना रोख इनाम देऊन गौरविण्यात येणार आहे.
४) राज्यस्तरीय डान्स स्पर्धा (शुक्रवार, दि. २४)
सायंकाळी ७ वाजता बाजारपेठ मैदानावर राज्यस्तरीय ग्रुप व सोलो रेकॉर्ड डान्स स्पर्धा होईल.
-
ग्रुप डान्स (खुला गट): २५ हजारांपासून १० हजारांपर्यंत बक्षिसे.
-
सोलो डान्स (छोटा गट – ४ ते १५ वर्षे): ११ हजारांपासून ५ हजारांपर्यंत बक्षिसे.
-
सोलो डान्स (मोठा गट – १५ वर्षांपुढे): १५ हजारांपासून ९ हजारांपर्यंत बक्षिसे.
५) महिलांसाठी ‘होम मिनिस्टर’ (शनिवार, दि. २५)
रात्री ९ वाजता बाजारपेठ मैदानावर महिलांसाठी ‘न्यू होम मिनिस्टर – खेळ पैठणीचा’ हा विशेष कार्यक्रम आयोजित करण्यात आला आहे. विजेत्या महिलांना फ्रीज, टीव्ही, वॉशिंग मशीन, कुलर, मिक्सर, कुकर आणि यात्रा समितीतर्फे मानाची ‘पैठणी’ दिली जाणार आहे.
६) लावणीचा फड (रविवार, दि. २६)
यात्रेच्या सांगता समारंभादिवशी रात्री ९ वाजता बाजारपेठ मैदानावर ‘बारा गावच्या बारा अप्सरा’ हा लावणीचा रंगारंग कार्यक्रम पार पडणार आहे.
कोरेगाव आणि परिसरातील सर्व नागरिकांनी या यात्रेतील सर्व विविध व मनोरंजक कार्यक्रमांचा मोठ्या संख्येने लाभ घ्यावा, असे आवाहन ‘श्री भैरवनाथ यात्रा समिती’ आणि ‘कोरेगाव नगरपंचायती’च्या वतीने करण्यात आले आहे.
