साताऱ्यातील गोवे-खंडोबाची वाडी ते गोवे दिगर रस्त्याला ‘ग्रामीण मार्ग’ दर्जा; ना. शिवेंद्रसिंहराजे भोसलेंच्या पुढाकाराने दळणवळण होणार सुकर
सातारा तालुक्यातील गोवे-खंडोबाची वाडी ते गोवे दिगर या रस्त्याला राज्य शासनाने ‘ग्रामीण मार्ग’ म्हणून दर्जोन्नती दिली आहे. यामुळे रस्त्याच्या विकासासाठी भरीव निधी मिळणार असून स्थानिक ग्रामस्थांमध्ये समाधान व्यक्त होत आहे.
स्थैर्य, सातारा, दि. ९ : सातारा तालुक्यातील गोवे-खंडोबाची वाडी ते गोवे दिगर या अवर्गीकृत आणि योजनाबाह्य रस्त्यावरील वाहतूक अधिक सुकर व सुरक्षित व्हावी, यासाठी या रस्त्याला आता अधिकृतरीत्या ‘ग्रामीण मार्ग’ म्हणून दर्जोन्नती देण्यात आली आहे. या महत्त्वपूर्ण निर्णयाबद्दल नगरसेवक अक्षय जाधव यांनी सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांचे विशेष आभार मानले आहेत.
रस्त्याच्या दर्जोन्नतीसाठी झालेला पाठपुरावा :
-
वाढती वर्दळ आणि मागणी: गोवे-खंडोबाची वाडी ते गोवे दिगर या रस्त्यावर अलीकडच्या काळात वाहनांची वर्दळ लक्षणीय वाढली आहे. हा रस्ता वाहतुकीसाठी अधिक निर्धोक व्हावा, यासाठी नगरसेवक अक्षय जाधव यांनी सार्वजनिक बांधकाम मंत्री शिवेंद्रसिंहराजे भोसले यांच्याकडे रस्त्याच्या दर्जोन्नतीची मागणी केली होती.
-
शासनाकडे प्रस्ताव: या मागणीची त्वरित दखल घेत ना. शिवेंद्रसिंहराजेंनी सार्वजनिक बांधकाम विभागाला या संदर्भातील प्रस्ताव राज्य शासनाकडे सादर करण्याच्या सूचना दिल्या होत्या.
-
ग्रामविकास विभागाची मान्यता: ना. शिवेंद्रसिंहराजेंच्या सूचनेनुसार व पाठपुराव्यामुळे, बांधकाम विभागाने हा प्रस्ताव राज्याच्या ग्रामविकास विभागाकडे सादर केला. अखेर शासनाने या अवर्गीकृत रस्त्याला ‘रस्ते विकास योजने’मध्ये समाविष्ट करून घेण्यास आणि ग्रामीण मार्गाचा दर्जा देण्यास मान्यता दिली आहे.
गोवे-खंडोबाची वाडी ते गोवे दिगर या रस्त्याला आता ‘ग्रामीण मार्ग’ असा दर्जा मिळाल्याने, या रस्त्याच्या भविष्यातील विकासासाठी आणि नूतनीकरणासाठी भरीव निधी उपलब्ध होणार आहे. यामुळे हा रस्ता दर्जेदार होऊन दळणवळण अधिक सोपे होईल, परिणामी परिसरातील ग्रामस्थांमधून मोठे समाधान व्यक्त केले जात आहे.
