१०० टक्के इथेनॉलवरील गाड्यांना मंजुरी; जुन्या पेट्रोल वाहनांचे भवितव्य काय ? जाणून घ्या
थेट WhatsApp वर मिळवा
केंद्र सरकारने केंद्रीय मोटार वाहन नियमांत मोठा बदल करत १०० टक्के इथेनॉलवर (E100) चालणाऱ्या फ्लेक्स-फ्युएल वाहनांना अधिकृत मंजुरी दिली असून, यामुळे कच्च्या तेलाची आयात कमी होऊन इंधनावरील खर्चात मोठी कपात होण्याची शक्यता आहे.
स्थैर्य, सातारा, दि. २७ ऑक्टोबर : वाढत्या प्रदूषणामुळे आणि महागड्या कच्च्या तेलाच्या आयातीमुळे देशासमोर ऊर्जा सुरक्षेचे मोठे आव्हान निर्माण झाले होते. यावर मात करण्यासाठी केंद्र सरकारने वाहन क्षेत्रात महत्त्वपूर्ण पाऊल उचलत E85 आणि E100 (शंभर टक्के इथेनॉल) इंधनावर चालणाऱ्या फ्लेक्स-फ्युएल वाहनांच्या नियमावलीला कायदेशीर मान्यता दिली आहे.
नियमावलीत बदल आणि जुन्या गाड्यांचे भवितव्य
केंद्रीय रस्ते वाहतूक आणि महामार्ग मंत्रालयाने उत्सर्जनाशी संबंधित मानकांमध्ये संशोधन करत E100 चा अधिकृत समावेश केला आहे. यामुळे वाहन उत्पादक कंपन्यांना शंभर टक्के इथेनॉलवर चालणाऱ्या गाड्यांचे उत्पादन व प्रमाणीकरण करणे सुलभ होणार आहे. दरम्यान, हे नवीन इंधन केवळ त्यासाठीच डिझाईन केलेल्या विशेष फ्लेक्स-फ्युएल वाहनांसाठीच असेल, असा स्पष्ट नियम आहे. सध्या रस्त्यावर धावणाऱ्या सामान्य पेट्रोल किंवा E20 गाड्यांमध्ये हे इंधन वापरता येणार नाही, त्यामुळे जुन्या वाहनधारकांना गाड्या बदलण्याची आवश्यकता नाही.
पर्यावरण आणि अर्थव्यवस्थेला फायदा
ब्राझील आणि अमेरिकेसारख्या देशांमध्ये फ्लेक्स-फ्युएल तंत्रज्ञानाचा वापर यशस्वी ठरला आहे. भारताला आपल्या गरजेपैकी ८० टक्क्यांहून अधिक कच्चे तेल आयात करावे लागते. इथेनॉलचा वापर वाढल्याने देशाचे अब्जावधी रुपयांचे परकीय चलन वाचणार असून कार्बन उत्सर्जनात घट होऊन पर्यावरणाचा र्हास रोखण्यास मदत होणार आहे.
