बिबी येथे कृषिकन्यांनी टी-बडिंग (कलमे) करण्याच्या प्रात्यक्षिकासह केले मार्गदर्शन
दैनिक स्थैर्य | दि. ३ डिसेंबर २०२४ | फलटण |
गुलाबाच्या रोपामध्ये ‘टी बडिंग’ (कलमे) करण्यासाठी लागणारे साहित्य आणि अशी कलमे करण्याचे फायदे याविषयी सविस्तर माहिती कृषीकन्यांनी बिबी, ता. फलटण येथील शेतकर्यांना दिली.
बियाण्यापासून निर्माण होऊ न शकणार्या विविधतेचे गुणाकार करण्यासाठी बडिंगचा वापर केला जातो. फळझाडे, गुलाब तयार करण्याची ही एक सामान्य पद्धत आहे. घरगुती बागेसाठी किंवा व्यवसायासाठी नवनवीन प्रकारची गुलाबाची रोपे तयार करण्यासाठी टी-बडिंगचा वापर केला जात असल्याचे या विद्यार्थिनींनी निदर्शनास आणून दिले.
फलटण एज्युकेशन सोसायटी संचलित, महात्मा फुले कृषी विद्यापीठ राहुरी मान्यता प्राप्त, कृषी महाविद्यालय, फलटण येथील अंतिम वर्षातील विद्यार्थिनींनी ग्रामीण कृषी जागरूकता कार्यानुभव व औद्योगिक जोड प्रकल्प २०२४-२५ कार्यक्रमांतर्गत बीबी, ता. फलटण येथे शेतकरी व ग्रामस्थांना टी-बडिंग (कलमे) कशी करावीत, प्रात्यक्षिकासह मार्गदर्शन केले.
याविषयी कृषी महाविद्यालय, फलटणचे प्राचार्य डॉ. यु. डी. चव्हाण, श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम समन्वयक प्रा. निलीमा धालपे, कार्यक्रम अधिकारी प्रा. स्वप्निल लाळगे, प्रा. नितिशा पंडित, विषयतज्ज्ञ प्रा. संजय आडत यांच्या मार्गदर्शनाखाली कृषीकन्या तनुजा शिंगाडे, प्रतिक्षा शिर्के, दिपाली दरेकर, संध्या ढवळे, विभावरी भोसले, आस्मा सय्यद, श्रद्धा झेंडे यांनी उत्कृष्ट पद्धतीने टी-बडिंग (कलम) कसे करायचे, याची माहिती दिली.
