शेतातील विहिरीवरील विद्युत मोटार चोरट्यांनी केली लंपास

स्थैर्य, फलटण, दि. १२ ऑगस्ट : तालुक्यातील एका गावात शेतातील विहिरीवर बसवलेली पाण्याची विद्युत मोटार आणि स्टार्टर अज्ञात चोरट्यांनी चोरून नेल्याची घटना घडली आहे. यामध्ये शेतकऱ्याचे सुमारे २५ हजार रुपयांचे नुकसान झाले असून, याप्रकरणी फलटण ग्रामीण पोलीस ठाण्यात अज्ञातांविरोधात गुन्हा दाखल करण्यात आला आहे.

फलटण ग्रामीण पोलिसांकडून मिळालेल्या माहितीनुसार, फिर्यादी शेतकरी हे आपल्या शेतातील विहिरीवरून पिकांना पाणी देण्यासाठी विद्युत मोटारीचा वापर करत होते. रात्रीच्या वेळी अज्ञात चोरट्यांनी विहिरीजवळ येऊन विद्युत मोटार आणि तिचा स्टार्टर चोरून नेला. सकाळी शेतकरी शेतात गेले असता, हा प्रकार त्यांच्या निदर्शनास आला.

या चोरीमुळे शेतकऱ्याच्या शेती कामांमध्ये मोठा अडथळा निर्माण झाला आहे. फिर्यादी शेतकऱ्याने दिलेल्या तक्रारीवरून, फलटण ग्रामीण पोलीस अज्ञात चोरट्यांचा शोध घेत आहेत.