आदित्य ठाकरेंनी गाडी चालवली म्हणून लगेच राजकीय अर्थ काढू नका: अजित पवारांची स्पष्टोक्ती

दैनिक स्थैर्य । दि. ११ फेब्रुवारी २०२१ । मुंबई । राज्याचे उपमुख्यमंत्री अजित पवार आणि पर्यावरण मंत्री आदित्य ठाकरे यांनी शुक्रवारी सकाळी मुंबईतील विकासकामांची पाहणी केली. यावेळी एका ठिकाणाहून दुसऱ्या ठिकाणी जाताना आदित्य ठाकरे स्वत: गाडी चालवत होते. तर अजित पवार त्यांच्या बाजूला बसले होते. मुळे मुंबई महानगरपालिकेच्या निवडणुकीत शिवसेना-राष्ट्रवादी एकत्रपणे लढणार, या चर्चेने जोर धरायला सुरुवात केली. मात्र, अजित पवार यांनी प्रसारमाध्यमांशी बोलताना इतक्यात राजकीय अर्थ काढण्याची घाई करु नका, असे स्पष्ट केले. आदित्य ठाकरे यांनी माझ्यासोबत असताना गाडी चालवली म्हणजे लगेच काही अर्थ काढण्याची गरज नाही. प्रत्येकाला गाडी चालवण्याची आवड असते. अनेकदा मुख्यमंत्री उद्धव ठाकरे हे देखील मातोश्रीवरुन वर्षा बंगल्यापर्यंत गाडी चालवत येतात. त्यामुळे लगेच मुंबई महानगरपालिकेच्या निवडणुकीत शिवसेना आणि राष्ट्रवादी एकत्र येणार, असे अंदाज बांधू नका. आमचं तीन पक्षांचं सरकार आहे, अनेक घटकपक्षांचाही आम्हाला पाठिंबा आहे. युतीचे निर्णय हे वरिष्ठ पातळीवर होतात. त्याची आत्ता चर्चा करण्याचे कोणतेही कारण नाही, असे अजित पवार यांनी सांगितले.

आम्ही तिन्ही पक्षांनी एकत्रपणे काम करायचे ठरवले आहे. त्यामुळे जिथं काही चांगलं असेल ते राज्याच्या इतर भागांमध्येही राबवता येईल का, हे पाहण्याच्यादृष्टीने मी आदित्य ठाकरे यांच्यासह मुंबईतील विकासकामांची पाहणी केली. आदित्य ठाकरे हे चांगल्याप्रकारे काम करत आहेत. त्यांच्या संकल्पनेतून मुंबईत अनेक चांगले उपक्रम राबवण्यात आले आहेत. विकास करताना पर्यावरणाला विशेषत: झाडांना धक्का लागणार नाही, हा आदित्य ठाकरे आणि मुख्यमंत्र्यांचा आग्रह असतो. मुंबईत अनेक उड्डाणपुलांच्या खाली सुशोभीकरण वाचनालय आणि सायकल ट्रॅकसाठी जागा उपलब्ध करुन देण्यात आली आहे. हे करताना कुठेही वाहतुकीला धक्का लागणार नाही, याची खबरदारी घेण्यात आल्याचे सांगत अजित पवार यांनी पालिकेच्या कार्यपद्धतीचे कौतुक केले.

प्रसारमाध्यमांना चकवा देऊन अजित पवार आणि आदित्य ठाकरे यांचा दौरा
अजित पवार एरवीही पुणे किंवा बारामतीत भल्या पहाटे विकासकामांचा पाहणी करताना दिसून आले आहेत. आजदेखील आदित्य ठाकरे यांना सोबत घेऊन अजितदादा सकाळीच मुंबईतील विकासकामांची पाहणी करण्यासाठी बाहेर पडले. सकाळी सात वाजल्यापासून या पाहणी दौऱ्याला सुरुवात झाली. बराचवेळ होऊनही प्रसारमाध्यमांना या दौऱ्याचा पत्ता नव्हता. अजित पवार आणि आदित्य ठाकरे यांनी मुंबईतील महालक्ष्मी रेसकोर्स, वरळी आणि धोबी तलाव परिसरातील प्रकल्पांची पाहणी केली. यावेळी अजित पवार आणि आदित्य ठाकरे अधिकाऱ्यांकडून माहिती घेताना दिसत होते.