सह्याद्री व्याघ्र प्रकल्पातील दुर्गम गावांत जिल्हाधिकाऱ्यांची ‘घोंगडी बैठक’; रखडलेल्या पुनर्वसनाला मिळणार गती
स्थैर्य, सातारा, दि. १२ : सह्याद्री व्याघ्र प्रकल्पातील अतिदुर्गम मळे, कोळणे आणि पाथरपुंज ही गावे अनेक दशकांपासून अभयारण्यग्रस्त म्हणून संघर्ष करत आहेत. व्याघ्र प्रकल्प जाहीर झाल्यापासून आजवर एकाही जिल्हाधिकाऱ्याने या भागाला भेट दिली नव्हती. मात्र, सातारा जिल्ह्याचे विद्यमान जिल्हाधिकारी संतोष पाटील यांनी थेट या दुर्गम भागात जाऊन ग्रामस्थांसोबत ‘घोंगडी बैठक’ घेतली. त्यांच्या या प्रत्यक्ष भेटीमुळे प्रशासनाच्या इतिहासात एक नवा अध्याय सुरू झाला असून, ग्रामस्थांच्या आशा पल्लवित झाल्या आहेत.
बैठकीतील महत्त्वाचे निर्णय आणि कार्यवाही:
-
पुनर्वसनाला गती: गेल्या अनेक वर्षांपासून प्रलंबित असलेल्या खातेदारांच्या संकलन याद्या येत्या पंधरा दिवसांत पूर्ण करण्याचे कडक निर्देश जिल्हाधिकाऱ्यांनी दिले आहेत. यामुळे पुनर्वसनाच्या प्रक्रियेला मोठा दिलासा मिळाला आहे.
-
शैक्षणिक सुविधा: कोळणे येथील जिल्हा परिषद शाळेच्या पडझडीची गंभीर दखल घेत त्यांनी तातडीने शाळेच्या दुरुस्तीचे आदेश दिले आहेत. विद्यार्थ्यांच्या भवितव्याच्या दृष्टीने हे पाऊल महत्त्वाचे मानले जात आहे.
-
पाणीप्रश्नावर तोडगा: पिण्याच्या पाण्याचा प्रश्न सोडवण्यासाठी त्यांनी केवळ कागदी आदेश न देता प्रत्यक्ष स्थळ पाहणी केली. येथे एक लहान बंधारा उभारण्याचे निश्चित करून त्याच्या सर्वेक्षणाचे आदेशही प्रशासनाला देण्यात आले आहेत.
‘शासन आपल्या दारी’ची प्रचिती
जिल्हाधिकाऱ्यांनी वातानुकूलित दालनात न बसता थेट गावकऱ्यांमध्ये जाऊन घोंगडी बैठकीतून त्यांच्या समस्या ऐकल्या आणि जागेवरच निर्णय घेतले. यामुळे ग्रामस्थांना खऱ्या अर्थाने ‘शासन आपल्या दारी’ असल्याची प्रचिती आली. प्रशासनाने दाखवलेली ही तत्परता जर लवकरच प्रत्यक्ष अंमलबजावणीत उतरली, तर या दुर्गम भागातील नागरिकांचे जीवन नक्कीच सुसह्य होईल, अशी अपेक्षा आता व्यक्त केली जात आहे.
