दैनिक ‘स्थैर्य’चे वृत्त तंतोतंत खरे! सातारा, सांगलीच्या पोलीस अधीक्षकांच्या बदल्यांचे आदेश धडकले; निखिल पिंगळे साताऱ्याचे नवे पोलीस अधीक्षक!
थेट WhatsApp वर मिळवा
दैनिक ‘स्थैर्य’ने वर्तवलेली पोलीस अधीक्षकांच्या बदल्यांची शक्यता तंतोतंत खरी ठरली आहे. गृह विभागाने आदेश जारी केले असून, पुण्याचे पोलीस उपायुक्त निखिल पिंगळे हे साताऱ्याचे नवे एसपी असतील, तर साताऱ्याचे तुषार दोषी यांची सांगलीत बदली झाली आहे.
स्थैर्य, फलटण, दि. 20 एप्रिल : राज्यातील पोलीस दलात मोठ्या खांदेपालटीचे संकेत असून सातारा, सांगली आणि पुणे जिल्ह्यातील वरिष्ठ पोलीस अधिकाऱ्यांच्या बदल्यांची दाट शक्यता असल्याचे वृत्त ‘दैनिक स्थैर्य’ने आजच प्रसिद्ध केले होते. अखेर काही तासांतच या वृत्तावर राज्याच्या गृह विभागाने शिक्कामोर्तब केले असून, दैनिक ‘स्थैर्य’चे वृत्त पुन्हा एकदा तंतोतंत खरे ठरले आहे!
राज्य शासनाच्या गृह विभागाने आज (दि. २० एप्रिल) राज्यातील ९ वरिष्ठ आयपीएस (IPS) अधिकाऱ्यांच्या बदल्यांचे अधिकृत शासन आदेश जारी केले आहेत. या आदेशानुसार पश्चिम महाराष्ट्रातील सातारा आणि सांगली जिल्ह्यांना नवे पोलीस अधीक्षक (SP) मिळाले आहेत.
सातारा आणि सांगलीतील प्रमुख बदल्या:
निखिल पिंगळे साताऱ्याचे नवे कारभारी: पुण्याचे विद्यमान पोलीस उप आयुक्त (DCP) निखिल पिंगळे यांची पदोन्नतीने सातारा जिल्ह्याचे नवे ‘पोलीस अधीक्षक’ म्हणून नियुक्ती करण्यात आली आहे.
तुषार दोषी सांगलीला: साताऱ्याचे विद्यमान पोलीस अधीक्षक तुषार दोषी यांची सांगली जिल्ह्याचे नवे पोलीस अधीक्षक म्हणून बदली करण्यात आली आहे.
संदिप घुगे मुंबईला: सांगलीचे विद्यमान पोलीस अधीक्षक संदिप घुगे यांची मुंबई येथे राज्य गुप्तवार्ता विभागात (पोलीस उप आयुक्त, सुरक्षा) बदली करण्यात आली आहे.
पुण्यातील आणखी एका अधिकाऱ्याची बदली:
पुणे येथील दुसरे पोलीस उप आयुक्त राजकुमार शिंदे यांचीही बदली करण्यात आली असून, त्यांच्याकडे आता वाशिम जिल्ह्याच्या पोलीस अधीक्षकपदाची जबाबदारी देण्यात आली आहे.
राज्यातील इतर महत्त्वपूर्ण बदल्या:
या आदेशानुसार राज्यातील इतरही महत्त्वाच्या जिल्ह्यांमध्ये खांदेपालट करण्यात आली आहे:
योगेश गुप्ता: पोलीस अधीक्षक, कोल्हापूर ते पोलीस उप महानिरीक्षक, गडचिरोली परिक्षेत्र.
निलोत्पल: पोलीस अधीक्षक, गडचिरोली ते पोलीस अधीक्षक, कोल्हापूर.
एम. रमेश: अपर पोलीस अधीक्षक, गडचिरोली ते पोलीस अधीक्षक, गडचिरोली.
महेश्वर रेड्डी: पोलीस अधीक्षक, जळगाव ते पोलीस अधीक्षक, राज्य गुन्हे अन्वेषण विभाग (CID), पुणे.
श्रीकांत धिवरे: पोलीस अधीक्षक, धुळे ते पोलीस अधीक्षक, जळगाव.
दैनिक ‘स्थैर्य’ने आपल्या खात्रीलायक सूत्रांच्या हवाल्याने दिलेली माहिती शासन आदेशाद्वारे अधिकृतपणे स्पष्ट झाल्याने, ‘स्थैर्य’च्या विश्वासार्हतेवर पुन्हा एकदा मोहोर उमटली आहे. साताऱ्याचे नवनियुक्त पोलीस अधीक्षक निखिल पिंगळे लवकरच आपल्या पदाचा कार्यभार स्वीकारतील.
