जिल्ह्यात पसरली थंडीची लाट; महाबळेश्वरपेक्षा सातारा ‘कूल’

गारठा कायम : सातारा शहरात 11 अंशाची नोंद

Phaltan Officeनोव्हेंबर 21, 2025Last Updated: नोव्हेंबर 21, 2025

दैनिक स्थैर्य • WhatsApp Channel

सातारा जिल्ह्यातील ताज्या बातम्या
थेट WhatsApp वर मिळवा

WhatsApp Channel JOIN करा ›

स्थैर्य, सातारा, दि. 21 नोव्हेंबर : जिल्ह्यातील किमान तापमान चार दिवसांपासन घसरले असून सातारा शहरात 11 तर महाबळेश्वरचा पारा 12.5 अंश नोंद झाला आहे. यामुळे थंड हवेच्या महाबळेश्वरपेक्षा सातारा ’कूल’ ठरले आहे. तसेच जिल्ह्याच्या इतर भागातीलही किमान तापमान 12 ते 13 अंशाच्या दरम्यान कायम असल्याने थंडीचा जोर दिसून येत आहे.
जिल्ह्यात नोव्हेंबर महिन्याच्या पहिल्या आठवड्यात थंडीला सुरुवात झाली. सुरुवातीला पारा 15 अंशापर्यंत खाली आला होता. त्यानंतर किमान तापमानात मोठ्या प्रमाणात उतार आला.

मागील चार-पाच दिवसांपासून तर पारा सतत खाली येत गेला. यामुळे गारठ्चात चांगलीच वाढ झाली आहे. त्यातच हवेत शीत लहर असल्याने दुपारी ही थंडी जाणवत आहे. यामुळे शहरापेक्षा ग्रामीण भाग अधिक थंड झाला आहे.

मंगळवारी महाबळेश्वरमध्ये 10 अंशाची तर सातारा शहरात 10.6 अंश तापमानाची नोंद झालेली. हे या हंगामातील निचांकी तापमान ठरले. पण, बुधवारी किमान तापमानात वाढ झाली. सातारा शहराचा पारा 11 अंशावर गेला. तर महाबळेश्वरचा पारा अडीच अंशाने वाढला. त्यामुळे बुधवारी महाबळेश्वरला 12.5 अंश किमान तापमान नोंद झाले.

तरीही जागतिक पर्यटनस्थळ असणार्‍या आणि थंड हवेच्या महाबळेश्वरपेक्षा सातारा शहर अधिक थंड असल्याचे दिसून आले. सातारा शहराबरोबरच परिसरातही गारठा कायम असल्याने मॉर्निंग वॉकसाठी जाणार्‍यांच्या संख्येत घट झाली आहे. सकाळी सात नंतरच अधिक करुन नागरिक घराबाहेर पडत आहेत. तर थंडीमुळे शहरात अनेक ठिकाणी शेकोट्या पेटू लागल्या आहेत. रात्री नऊ नंतर आणि. पहाटेच्या सुमारास शेकोट्या पेटल्याचे चित्र आहे.जिल्ह्यातच थंडीत वाढ झाली आहे. यामुळे शेतीच्या कामावर परिणाम झाला आहे. शेतकरीवर्ग दुपारच्या सुमारास शेतातील कामे उरकून घेत आहेत. तर विजेच्या वेळापत्रकाप्रमाणे शेतकरी रात्रीही पिकांना पाणी देण्याची मोटारी सुरू करत आहेत. यामुळे शेतकर्‍यांच्या आरोग्यावर परिणाम होण्याची भीती व्यक्त होत आहे.