मुख्यमंत्री वैद्यकीय सहाय्यता निधीची ‘अद्ययावत ऑनलाईन प्रणाली’; आता रुग्णालयातूनच थेट अर्ज, अवघ्या ८ तासांत मिळणार मंजुरी!
राज्यातील गरजू रुग्णांसाठी मुख्यमंत्री वैद्यकीय सहाय्यता निधीची नवीन ऑनलाईन प्रणाली लवकरच सुरू होणार आहे. आता रुग्णांऐवजी थेट रुग्णालयामार्फत अर्ज सादर होणार असून अवघ्या ८ तासांत निधीला मंजुरी मिळणार आहे.
स्थैर्य, फलटण, दि. १३ एप्रिल : राज्यातील गरजू आणि आर्थिकदृष्ट्या दुर्बल घटकातील रुग्णांना उपचारासाठी मिळणारे आर्थिक सहाय्य आता अधिक वेगात आणि विनासायास मिळणार आहे. मुख्यमंत्री सहाय्यता निधी व धर्मादाय रुग्णालय मदत कक्षाची एक ‘अद्ययावत ऑनलाईन प्रणाली’ लवकरच सुरू होणार असून, यामुळे अर्ज मंजुरीची प्रक्रिया कार्यालयीन अवघ्या ८ तासांत पूर्ण होणार आहे. राज्याचे मुख्यमंत्री देवेंद्र फडणवीस यांच्या हस्ते येत्या काही दिवसांतच या नव्या प्रणालीचे अधिकृत उद्घाटन करण्यात येणार आहे.
रुग्णांना अर्ज भरण्यापासून मुक्ती; रुग्णालयेच करणार थेट अर्ज:
गेल्या वर्षभरापासून मुख्यमंत्री सहाय्यता निधी व धर्मादाय रुग्णालय मदत कक्षामध्ये नावीन्यपूर्ण आणि ‘रुग्णस्नेही’ बदल करण्याचे काम सातत्याने सुरू आहे. त्याचाच एक अत्यंत महत्त्वाचा भाग म्हणून ही नवी ऑनलाईन प्रणाली विकसित करण्यात आली आहे.
या प्रणालीचे सर्वात मोठे वैशिष्ट्य म्हणजे, आता मदतीसाठी रुग्णाला किंवा त्याच्या नातेवाईकाला स्वतः कोणत्याही प्रकारचा अर्ज भरावा लागणार नाही. रुग्णाने रुग्णालयात सर्व रीतसर कागदपत्रे जमा केल्यानंतर, कक्षाशी संलग्न असणारे रुग्णालय प्रशासन स्वतःच तो अर्ज मुख्यमंत्री सहायता निधी कार्यालयाकडे मंजुरीसाठी ऑनलाईन पाठवेल.
८ तासांत मिळणार मंजुरी आणि उपचारांना गती:
रुग्णालयाने पाठवलेल्या अर्जामध्ये नियमानुसार सर्व कागदपत्रे अचूक असल्यास, अर्ज मंजुरीची प्रक्रिया कार्यालयीन केवळ ८ तासांत पूर्ण होईल. यामुळे उपचाराच्या प्रक्रियेला मोठी गती मिळणार असून, पैशांची जुळवाजुळव करण्यासाठी वणवण भटकणाऱ्या रुग्णांना आणि त्यांच्या नातेवाईकांना मोठा दिलासा मिळणार आहे.
एका वर्षात तब्बल ३३३ कोटींची वैद्यकीय मदत:
गेल्या आर्थिक वर्षात (१ एप्रिल २०२५ ते ३१ मार्च २०२६ या कालावधीत) मुख्यमंत्री वैद्यकीय सहाय्यता निधीच्या माध्यमातून राज्यातील तब्बल ४० हजार ७७६ गरजू रुग्णांना ३३३ कोटी ६ लाख ८१ हजार ५०० रुपयांची घसघशीत वैद्यकीय मदत देण्यात आली आहे. या नव्या ऑनलाईन प्रणालीमुळे मदत वितरणातील पारदर्शकता आणि वेग आणखी वाढेल.
अधिक माहितीसाठी ‘टोल फ्री’ क्रमांकावर संपर्क:
मुख्यमंत्री सहाय्यता निधी व धर्मादाय रुग्णालय मदत कक्षाचे कक्षप्रमुख रामेश्वर नाईक यांनी याबाबत माहिती देताना सांगितले की, “रुग्णांना वेळेत उपचार मिळावेत, यासाठी ही ऑनलाईन प्रणाली विकसित करण्यात येत आहे. यामुळे आता अर्ज मंजुरीची प्रक्रिया अत्यंत जलद होऊन रुग्णांना मोठा दिलासा मिळेल. मुख्यमंत्री देवेंद्र फडणवीस यांच्या हस्ते या नवीन प्रणालीचे लवकरच उद्घाटन झाल्यानंतर राज्यभरात ती प्रभावीपणे राबवण्यात येणार आहे.”
गरजू रुग्णांनी या योजनेचा लाभ घेण्यासाठी आणि अधिक माहिती मिळवण्यासाठी १८०० १२३ २२११ या ‘टोल फ्री’ क्रमांकावर संपर्क साधावा, असे आवाहन प्रशासनाच्या वतीने करण्यात आले आहे.
