बारव पुनरुज्जीवनासाठी २५ कोटींचा निधी; दुष्काळग्रस्त भागात २५०० रोजगाराच्या संधी
थेट WhatsApp वर मिळवा
राज्यातील दुष्काळग्रस्त भागात ऐतिहासिक बारवांच्या (पायऱ्यांच्या विहिरी) पुनरुज्जीवनासाठी सांस्कृतिक विभागाने २५ कोटींच्या निधीची तरतूद केली असून स्थानिकांना रोजगाराची नवी संधी मिळणार आहे.
स्थैर्य,सातारा, दि. ०६ ऑक्टोबर : राज्यातील दुष्काळग्रस्त भागातील नागरिकांना मोठा दिलासा देण्यासाठी आणि ऐतिहासिक वारशाचे जतन करण्यासाठी राज्य सरकारच्या सांस्कृतिक विभागाने एक महत्त्वपूर्ण निर्णय घेतला आहे. दुष्काळग्रस्त भागांमध्ये ऐतिहासिक बारवांच्या (पायऱ्यांच्या विहिरी) पुनरुज्जीवनासाठी तब्बल २५ कोटी रुपयांच्या निधीची तरतूद करण्यात आली आहे. या उपक्रमामुळे जलसंधारणाला गती मिळण्यासोबतच स्थानिक पातळीवर सुमारे २ हजार ५०० रोजगाराच्या संधी निर्माण होणार आहेत.
सांस्कृतिक आणि रोजगार हमी योजनेचा संगम
राज्यातील दुष्काळी परिस्थितीच्या पार्श्वभूमीवर ऐतिहासिक वास्तूंचे संरक्षण आणि स्थानिक हातांना काम देणे या दोन्ही उद्देशांनी हा निर्णय घेण्यात आला आहे. सांस्कृतिक विभाग, रोजगार हमी योजना, स्थानिक नागरिक आणि स्वयंसेवी संस्थांच्या संयुक्त विद्यमाने ही मोहीम राबवली जाणार आहे. पुरातत्व संचालनालयाच्या अखत्यारित असलेल्या राज्य संरक्षित स्मारकांची स्वच्छता, साफसफाई आणि देखभालीची कामे रोहयोच्या माध्यमातून स्थानिकांना दिली जातील.
स्थानिक लोककलावंत आणि महोत्सवांबाबत महत्त्वाचे निर्देश
दुष्काळी परिस्थितीचे भान ठेवून आगामी काळातील सांस्कृतिक महोत्सव मर्यादित आणि साधेपणाने साजरे करण्याचे निर्देश देण्यात आले आहेत. उधळपट्टी टाळून दुष्काळग्रस्त भागातील स्थानिक लोककलावंतांना प्राधान्याने मदत होईल अशा कार्यक्रमांचे आयोजन केले जाईल. तसेच मुख्यमंत्री सहाय्यता निधीसाठी मदत करणाऱ्या कलावंतांना मुंबईतील पु. ल. देशपांडे कला अकादमीचे सभागृह विनामूल्य उपलब्ध करून दिले जाणार आहे.
