‘शिवछत्रपती पुरस्कार’ मिळाल्याने कु. अक्षता ढेकळेचे विविध स्तरांवरून अभिनंदन
दैनिक स्थैर्य | दि. ५ ऑक्टोबर २०२४ | फलटण |
वाखरी, ता. फलटण या कायम दुष्काळी पट्ट्यातील छोट्या खेड्यातील शेतकरी कुटुंबात जन्मलेली कु. अक्षता आबासाहेब ढेकळे या राष्ट्रीय व आंतरराष्ट्रीय हॉकी खेळाडूला महाराष्ट्र शासन शालेय शिक्षण व क्रीडा विभागाचा सर्वोच्च मानाचा ‘शिवछत्रपती राज्य क्रीडा पुरस्कार’ जाहीर झाला आहे. या घोषणेनंतर कु. अक्षता ढेकळे हिचे विविध स्तरांवरून अभिनंदन होत आहे.
एक लाख रुपये रोख, सन्मानचिन्ह, सन्मानपत्र, शाल, श्रीफळ, पुष्पगुच्छ असे या पुरस्काराचे स्वरूप आहे.
‘शिवछत्रपती पुरस्कार’ हा सर्वोच्च क्रीडा पुरस्कार सुमारे ३० वर्षांनंतर कु. अक्षता ढेकळे या गुणी खेळाडूच्या रुपाने हॉकीला मिळाला आहे. हॉकीमध्ये शिवछत्रपती पुरस्कार मिळविणारी कु.अक्षता ढेकळे ही पहिलीच महिला खेळाडू असावी, असे मत व्यक्त होत आहे.
कु. अक्षता आबासाहेब ढेकळे हिने मोठ्या मेहनतीने अल्पावधीत आंतरराष्ट्रीय हॉकीतील ‘सुवर्णकन्या’ असा नावलौकिक प्राप्त करीत भारतीय महिला हॉकी संघाचा दबदबा राष्ट्रीय व आंतरराष्ट्रीय पातळीवर निर्माण करण्यात मोठे योगदान दिले आहे.
सर्वोत्कृष्ट राष्ट्रीय व आंतराष्ट्रीय हॉकी खेळाडू आणि ‘वर्ल्ड कप सिल्व्हर मेडल’ प्राप्त खेळाडू असा कु. अक्षता ढेकळे हिचा परिचय आहे. तिने आतापर्यंत साऊथ अमेरिका, नेदरलँडस्, बेल्जियम, इंग्लंड, स्पेन, ओमान, साऊथ आफ्रिका, फ्रान्स वगैरे देशातील ९ आंतरराष्ट्रीय हॉकी स्पर्धेत भारतीय संघातून खेळत भारतीय हॉकीची उज्ज्वल परंपरा जगासमोर ठेवली आहे.
कु. अक्षता ढेकळे ही आशिया कप गोल्ड मेडलिस्ट, वर्ल्ड कप सिल्व्हर मेडलिस्ट, राष्ट्रीय गोल्ड मेडलिस्ट असून तिने अल्पावधीत ९ आंतरराष्ट्रीय, २४ राष्ट्रीय, १३ राज्यस्तरीय मेडल्स मिळविली आहेत.
एकाच वर्षात सिनिअर व ज्युनिअर वर्ल्ड कपमध्ये महाराष्ट्राचे प्रतिनिधीत्व करणारी पहिली महिला हॉकी खेळाडू आणि सर्वात कमी वयात सिनिअर वर्ल्ड कपमध्ये भारताचे प्रतिनिधीत्व करणारी तरुण खेळाडू हा बहुमान मिळविण्यात कु. अक्षता ढेकळे यशस्वी झाली आहे.
फलटण पंचायत समिती माजी सभापती रामभाऊ ढेकळे यांची पुतणी आणि आबासाहेब ढेकळे व सौ. संध्या ढेकळे या शेतकरी दाम्पत्याची कु. अक्षता सुकन्या आहे.
कु. अक्षताचा कुटुंबियांच्यावतीनेही आई-वडील, चुलते-चुलती व भावंडे यांनी सत्कार केला.
