नव्या मतदार यादीत नाव नसल्यास मतदानाची संधी हुकणार; नोव्हेंबरमध्ये अंतिम प्रसिद्धी
थेट WhatsApp वर मिळवा
विशेष सखोल पुनरीक्षण मोहिमेअंतर्गत सातारा जिल्ह्यातील नव्याने तयार होणारी अंतिम मतदार यादी नोव्हेंबर महिन्यात प्रसिद्ध केली जाणार असून नागरिकांना नाव नोंदणीची शेवटची संधी उपलब्ध झाली आहे.
स्थैर्य, सातारा, दि. ०३ ऑक्टोबर : सातारा जिल्ह्यात केंद्रीय निवडणूक आयोगाच्या सूचनेनुसार राबवण्यात येत असलेल्या विशेष सखोल पुनरीक्षण (SIR) मोहिमेची प्रक्रिया अंतिम टप्प्यात पोहोचली आहे. या मोहिमेनंतर तयार होणारी अंतिम बिनचूक मतदार यादी नोव्हेंबर महिन्यात अधिकृतपणे प्रसिद्ध केली जाणार आहे. आगामी निवडणुकांच्या पार्श्वभूमीवर नव्या मतदार यादीत नाव समाविष्ट नसलेल्या किंवा चुकीची नोंद असलेल्या नागरिकांना मतदानाचा हक्क बजावता येणार नाही. त्यामुळे नागरिकांनी आपल्या नावाची खात्री करून वेळेत अर्ज सादर करण्याचे आवाहन निवडणूक शाखेकडून करण्यात आले आहे.
दावे अन् हरकतींसाठी बीएलओंकडे अर्जांची सुविधा
सखोल पुनरीक्षण मोहिमेदरम्यान जिल्ह्यातील दुबार, मृत तसेच स्थलांतरित मतदारांची नावे वगळण्यात आली आहेत. यानंतर तयार करण्यात आलेली प्रारूप मतदार यादी सर्व मतदान केंद्रांवर उपलब्ध करून देण्यात आली आहे. ज्या नागरिकांची नावे यादीतून वगळली गेली आहेत किंवा ज्यांचे वय १८ वर्षे पूर्ण झाले आहे, त्यांना फॉर्म नंबर ६ भरून नव्याने नाव नोंदवण्याची संधी आहे. यासाठी संबंधित परिसरातील बूथ लेव्हल ऑफिसर (BLO) यांच्याकडे आवश्यक कागदपत्रांसह अर्ज सादर करता येणार आहेत.
राजकीय पक्षांच्या प्रतिनिधींसोबत यादीची पडताळणी
निवडणूक प्रशासनाने पारदर्शकतेसाठी मान्यताप्राप्त राजकीय पक्षांच्या बूथ लेव्हल एजंट्सना (BLA) देखील या प्रक्रियेत सहभागी करून घेतले आहे. बीएलओंनी तयार केलेली यादी राजकीय पक्षांच्या प्रतिनिधींसोबत शेअर करण्यात येत आहे. प्राप्त झालेल्या सर्व दावे आणि हरकतींची निवडणूक नोंदणी अधिकाऱ्यांकडून (ERO) कसून तपासणी केली जाईल. नोव्हेंबरमध्ये अंतिम यादी प्रसिद्ध झाल्यानंतर कोणत्याही प्रकारचा बदल करणे शक्य होणार नसल्याने नागरिकांनी तातडीने नाव नोंदणी पूर्ण करावी.
