साताऱ्यात डीजेचा दणदणाट भोवला; २९ गणेश मंडळांवर गुन्हे दाखल करत २ कोटींचे साहित्य जप्त
गणेश विसर्जन मिरवणुकीत उच्च न्यायालयाच्या नियमांचे उल्लंघन करत मोठ्या आवाजात डीजे वाजवणाऱ्या साताऱ्यातील २९ गणेश मंडळांवर पोलिसांनी कडक कारवाई केली आहे.
स्थैर्य, सातारा, दि. २८ सप्टेंबर : गणेश विसर्जन मिरवणुकीदरम्यान उच्च न्यायालय आणि शासनाच्या नियमांची पायमल्ली करत बेकायदेशीरपणे डीजे व साऊंड सिस्टीमचा वापर करणाऱ्या साताऱ्यातील २९ गणेश मंडळांवर पोलिसांनी कडक कारवाई केली आहे. सातारा शहर आणि शाहूपुरी पोलीस ठाण्याच्या हद्दीत पोलिसांनी राबवलेल्या या धडक मोहिमेत २९ गणेश मंडळांवर गुन्हे दाखल करण्यात आले असून सुमारे २ कोटी रुपये किमतीचे डीजे साहित्य, ध्वनिवर्धक आणि वाहने जप्त करण्यात आली आहेत.
शाहूपुरी आणि सातारा शहरात धडक कारवाई
विसर्जन मिरवणुकीदरम्यान ध्वनिमर्यादेचे उल्लंघन आणि रस्त्यावर वाहतुकीस अडथळा निर्माण केल्याप्रकरणी पोलीस प्रशासनाने ही विशेष मोहीम राबवली. शाहूपुरी पोलीस ठाण्याच्या हद्दीत १५ आणि सातारा शहर पोलीस ठाण्याच्या हद्दीत १४ अशा एकूण २९ गणेश मंडळांवर भारतीय नागरिक सुरक्षा संहितेच्या विविध कलमांनुसार गुन्हे दाखल करण्यात आले आहेत. नियमांचे उल्लंघन करणाऱ्या मंडळांसह डीजे मालक, ट्रॅक्टर आणि टेम्पो चालकांचाही या कारवाईत समावेश आहे.
दोन कोटींची साऊंड सिस्टीम आणि वाहने जप्त
पोलीस अधीक्षक आणि वरिष्ठ अधिकाऱ्यांच्या मार्गदर्शनाखाली पोलिसांनी कारवाई करत मिरवणुकीत वापरण्यात आलेले अवाढव्य डीजे स्पिकर्स, अॅम्प्लिफायर, जनरेटर, तसेच साहित्याची वाहतूक करणारे ट्रॅक्टर व ट्रॉली जप्त केल्या आहेत. या जप्त करण्यात आलेल्या साहित्याची एकूण किंमत सुमारे २ कोटी रुपयांच्या घरात आहे. विसर्जन मिरवणुकीपूर्वीच नोटीस बजावूनही नियमांचे उल्लंघन केल्यामुळे ही कठोर पावले उचलण्यात आल्याचे पोलिसांनी स्पष्ट केले.
