‘कर्तव्य’मुळे १०१ मुलांची दुर्धर आजारावर मात; स्व. भाऊसाहेब महाराजांच्या जयंतीनिमित्त साताऱ्यात मोफत शस्त्रक्रिया शिबीर उत्साहात संपन्न

 सातत्याने नावीन्यपूर्ण सामाजिक उपक्रम राबवणाऱ्या ‘कर्तव्य सोशल ग्रुप’च्या माध्यमातून साताऱ्यात ० ते १८ वयोगटातील १०१ गरजू मुलांवर मोफत शस्त्रक्रिया करण्यात आल्या. स्व. श्रीमंत छ. अभयसिंहराजे भोसले (भाऊसाहेब महाराज) यांच्या ८२ व्या जयंतीनिमित्त या भव्य शिबिराचे आयोजन करण्यात आले होते.

 स्थैर्य, सातारा, दि. १७ : सातारा जिल्ह्यातील गोरगरीब आणि गरजू कुटुंबांतील व्याधीग्रस्त मुलांना निरोगी जीवन जगता यावे, या उद्देशाने ‘कर्तव्य सोशल ग्रुप’च्या वतीने सलग दुसऱ्या वर्षी मोफत शस्त्रक्रिया शिबिराचे आयोजन करण्यात आले होते. ना. श्रीमंत छ. शिवेंद्रसिंहराजे भोसले यांच्या मार्गदर्शनाखाली हा अनोखा उपक्रम हाती घेण्यात आला असून, यामुळे १०१ मुलांनी विविध दुर्धर आजारांवर यशस्वी मात केली आहे.

शिबिराची प्रमुख वैशिष्ट्ये आणि वैद्यकीय मदत:

• यशस्वी शस्त्रक्रिया: या शिबिरात हर्निया, हायड्रोसिल, टंग-टाय, फायमोसिस, केलाईड आदी आजारांवरील शस्त्रक्रिया मोफत करण्यात आल्या. काल ९७ मुलांवर यशस्वी शस्त्रक्रिया पार पडल्या.

• विशेष उपचार: विशेष शस्त्रक्रियेची आवश्यकता असलेल्या ११ मुलांवर ठाणे येथील ‘कौशल्या हॉस्पिटल’मध्ये मोफत शस्त्रक्रिया केली जाणार आहे.

• तज्ज्ञ डॉक्टरांची टीम: मुंबई येथील नामांकित पीडियाट्रिक सर्जन डॉ. संजय ओक, डॉ. पारस कोठारी, डॉ. आदिती दळवी, भूलतज्ज्ञ डॉ. आमिर तसेच सायन हॉस्पिटलच्या (मुंबई) डॉ. उमाळे, डॉ. श्वेता काणे, डॉ. रुचिता शहा, डॉ. रवीना शेट्टी, कुमुद खडपे या वैद्यकीय टीमने या शस्त्रक्रिया पार पाडल्या.

• सहकार्य: साताऱ्यातील ‘छत्रपती संभाजी महाराज वैद्यकीय महाविद्यालय’ आणि ‘क्रांतिसिंह नाना पाटील जिल्हा रुग्णालय’ येथील वैद्यकीय टीमने या प्रक्रियेत मोलाची मदत केली. मेडिकल कॉलेजचे डीन डॉ. विनायक काळे आणि जिल्हा शल्यचिकित्सक डॉ. राहुल जाधव यांचेही मोठे सहकार्य लाभले.

‘कर्तव्य’मुळे गोरगरिबांना मोठा आधार:

गोरगरीब कुटुंबातील मुलांवर मोफत शस्त्रक्रिया झाल्यामुळे त्यांच्या कुटुंबाचे लाखो रुपये वाचले आहेत व त्यांना मोठा दिलासा मिळाला आहे. विशेष म्हणजे गेल्या वर्षीच्या पहिल्या शिबिरातही तब्बल १०७ मुलांवर विविध प्रकारच्या शस्त्रक्रिया करण्यात आल्या होत्या.

या शिबिराच्या यशस्वितेसाठी कर्तव्य सोशल ग्रुपचे सदस्य विजय देशमुख, विलास कासार, महेश यादव, राजू महाडिक, दीपक भोसले, महेंद्र गार्डे, रवी पवार, चंद्रकांत बेबले, प्रकाश घाडगे आदींसह सर्व सहभागी रुग्णालयांच्या स्टाफने मोठे परिश्रम घेतले. ‘कर्तव्य’च्या या उपक्रमामुळे व्याधीग्रस्त मुलांना निरोगी जीवन जगण्याची नवी दिशा मिळत आहे.