दुष्काळग्रस्त विद्यार्थ्यांना मोठा दिलासा; परीक्षा शुल्कासाठी ‘झिरो चलन’ सुविधा लागू
थेट WhatsApp वर मिळवा
राज्यातील दुष्काळग्रस्त भागातील विद्यार्थ्यांसाठी उच्च व तंत्र शिक्षण विभागाने महत्त्वपूर्ण निर्णय घेतला असून, आता परीक्षा शुल्कासाठी ‘झिरो चलन’ सुविधा उपलब्ध करून देण्यात आली आहे.
स्थैर्य,सातारा, दि. २४ ऑक्टोबर : दुष्काळग्रस्त तालुक्यांतील विद्यार्थ्यांना आर्थिक अडचणींमुळे शिक्षणात अडथळे येऊ नयेत, यासाठी राज्य शासनाने परीक्षा शुल्कमाफीचा निर्णय घेतला आहे. या निर्णयाची प्रभावी अंमलबजावणी सुरू असून, आतापर्यंत तब्बल २ लाख ४० हजार ३६५ विद्यार्थ्यांनी परीक्षा शुल्काचा एकही रुपया न भरता ‘झिरो चलन’ सुविधेद्वारे आपले परीक्षा अर्ज दाखल केले आहेत, अशी माहिती उच्च व तंत्र शिक्षण मंत्री चंद्रकांत पाटील यांनी दिली.
शुल्कमाफी आणि परत करण्याची प्रक्रिया
विद्यार्थ्यांना परीक्षा अर्ज भरताना शुल्क भरावे लागू नये, यासाठी अर्ज प्रक्रियेत ‘झिरो चलन’ हा पर्याय उपलब्ध करून देण्यात आला आहे. याद्वारे पात्र विद्यार्थ्यांना कोणतेही शुल्क न भरता अर्ज सादर करणे सुलभ झाले आहे. दरम्यान, ज्या विद्यार्थ्यांनी यापूर्वीच परीक्षा शुल्क भरले आहे, त्यांना ते शुल्क परत करण्याची प्रक्रिया देखील सुरू करण्यात आली आहे.
विद्यापीठांना स्पष्ट निर्देश व संपर्काचे आवाहन
दुष्काळग्रस्त भागातील कोणताही विद्यार्थी या सवलतीपासून वंचित राहू नये, यासाठी सर्व विद्यापीठांना स्पष्ट सूचना देण्यात आल्या आहेत. विद्यार्थ्यांना यासंदर्भात काही तांत्रिक किंवा शैक्षणिक अडचण आल्यास संबंधित विद्यापीठाच्या परीक्षा व मूल्यमापन मंडळ किंवा जनसंपर्क अधिकाऱ्यांशी संपर्क साधण्याचे आवाहन विभागातर्फे करण्यात आले आहे.
