राजे गटाला एकाच वेळी तिहेरी धक्का ! आसिफ मिटकरी, सागर दोशी आणि वैशाली शिंदे यांची ‘युती’ला साथ; निवडणुकीच्या तोंडावर समीकरणे बदलली
स्थैर्य, फलटण, दि. २१ नोव्हेंबर : फलटण नगरपरिषद निवडणुकीच्या रणधुमाळीत राजे गटाला (रामराजे नाईक निंबाळकर गट) एकाच वेळी जोरदार धक्के बसले आहेत. राजे गटाचे कट्टर समर्थक मानले जाणारे माजी नगरसेवक, जैन समाजाचे युवा नेतृत्व आणि शैक्षणिक क्षेत्रातील मान्यवरांनी भारतीय जनता पार्टी व राष्ट्रवादी काँग्रेस (युती) मध्ये प्रवेश केला आहे. या लागोपाठच्या प्रवेशांमुळे युतीची ताकद लक्षणीयरीत्या वाढली आहे.
आसिफ मिटकरींचा ‘घड्याळा’ला पाठिंबा
फलटण नगरपरिषदेचे माजी नगरसेवक आणि अल्पसंख्याक समाजातील प्रभावी चेहरा आसिफ उर्फ बाळासाहेब मिटकरी यांनी राजे गटाला रामराम ठोकला आहे. त्यांनी आपल्या कार्यकर्त्यांसह राष्ट्रवादी काँग्रेस पक्षात प्रवेश केला. मिटकरी यांच्या प्रवेशामुळे प्रभाग आणि परिसरात युतीची बाजू भक्कम झाली आहे.
वैशाली शिंदे यांचा भाजपात प्रवेश
दुसरीकडे, शैक्षणिक आणि सामाजिक क्षेत्रात कार्यरत असलेल्या ‘आयडियल किड्स’च्या संस्थापिका वैशाली शिंदे यांनी आपल्या सहकाऱ्यांसमवेत भारतीय जनता पार्टीमध्ये प्रवेश केला. महिला मतदारांवर आणि शैक्षणिक वर्तुळात त्यांचा चांगला प्रभाव असल्याने भाजपाला याचा फायदा होणार आहे.
सागर दोशींची साथ; राजे गटाला खिंडार
या राजकीय घडामोडीत सर्वात मोठा धक्का सागर अजयकुमार दोशी यांच्या रूपाने राजे गटाला बसला आहे. सागर दोशी हे राजे गटाचे कट्टर समर्थक आणि राष्ट्रवादी काँग्रेसचे (राजे गट) माजी शहर प्रवक्ते म्हणून ओळखले जात होते. तसेच ते जैन समाजाचे युवा नेतृत्व आणि ‘अहिंसा युवक कमिटी बहुउद्देशीय संस्थे’चे संस्थापक अध्यक्ष आहेत.
सागर दोशी यांनी आपले मित्र आणि ‘ओंकार गणेशोत्सव मंडळा’च्या पदाधिकाऱ्यांसह युतीच्या उमेदवारांना पाठिंबा दर्शवला आहे. जैन समाजातील तरुण आणि गणेशोत्सव मंडळाचे नेटवर्क पाठीशी असल्याने हा निर्णय निवडणुकीच्या निकालावर प्रभाव टाकणारा ठरू शकतो.
एकाच दिवसात झालेल्या या महत्त्वाच्या प्रवेशांमुळे रणजितसिंह नाईक निंबाळकर यांच्या नेतृत्वाखालील भाजपा-राष्ट्रवादी युतीचे पारडे जड झाल्याचे चित्र निर्माण झाले आहे.
