यंदा प्रजासत्ताकदिनी राजपथावरील संचलनात होणार महाराष्ट्रातील संतपरंपरेचे दर्शन

स्थैर्य, फलटण दि.25 : महाराष्ट्राच्यावतीने वारकरी संतपरंपरे वर आधारित चित्ररथ यावर्षी 72व्या प्रजासत्ताकदिनी 26 जानेवारी 2021 रोजी होणार्‍या राजपथावरील पथसंचलनासाठी सज्ज झाला आहे. वारकरी संप्रदायाचा पाया रचणार्‍या संतश्रेष्ठ ज्ञानेश्‍वर महाराजांची 8 फूट उंचीची आसनस्थ मूर्ती खास आकर्षण आहे. संत ज्ञानेश्‍वरांच्या मूर्ती समोर श्री ज्ञानेश्‍वरी ग्रंथ दर्शवण्यात आला आहे. चित्ररथाच्या मध्यभागी हिंदवी स्वराज्य संस्थापक छत्रपती शिवाजी शिवाजी महाराज आणि वारकरी संप्रदायाच्या इमारतीचे कळस असलेले जगद्गुरू संत तुकाराम महाराज यांच्या भेटीवर आधारित ’भक्ती आणि शक्ती’चा संदेश देणारे प्रत्येकी 8 फूट उंचीचे फिरते पुतळे आहेत.

या चित्ररथावरील राज्यातील वारकरी संतांचे व भक्तांचे दैवत असणार्‍या भगवान श्री विठ्ठलाची कटेवर हात असणारी 8.5 फूट उंचीची राजस, सुकुमार मूर्ती अवतरली आहे. चित्ररथाच्या शेवटच्या भागात 8 फूट उंचीचा ‘संतवाणी’ हा ग्रंथ उभारण्यात आला आहे. यावर संतांची वचने लिहिण्यात आली आहेत.

चित्ररथाच्या दोन्ही बाजुंना श्री विठ्ठलाच्या निस्सीम भक्त संत जनाबाई, संत कान्होपात्रा, संत नामदेव महाराज, संत शेख महंमद, संत नरहरी महाराज, संत सावता महाराज, संत दामाजीपंत, संत गोरोबाकाका, शांतिब्रह्म संत एकनाथ महाराज, संत सेना महाराज, संत चोखामेळा यांच्या मूर्ती उभारण्यात आल्या आहे .