फलटणच्या मुधोजी हायस्कूलला राज्यस्तरीय ‘महाराष्ट्र समाज भूषण’ पुरस्कार जाहीर
दैनिक स्थैर्य | दि. ८ ऑगस्ट २०२३ | फलटण |
फलटण येथील नामांकित व १५० वर्षांची उज्ज्वल परंपरा असलेल्या फलटण एज्युकेशन सोसायटीच्या मुधोजी हायस्कूल व ज्युनिअर कॉलेज फलटण या विद्यालयाने आजपर्यंत शैक्षणिक व सामाजिक क्षेत्रात केलेल्या उत्कृष्ट कार्याबद्दल राज्यस्तरीय ‘महाराष्ट्र समाज भूषण’ या पुरस्कारासाठी निवड करण्यात आली आहे.
हा पुरस्कार मुधोजी हायस्कूल व ज्युनिअर कॉलेजच्या शिक्षक व त्यांच्या सहकार्‍यांनी शैक्षणिक व सामाजिक क्षेत्रात भरीव योगदान दिल्यामुळे फलटण तालुक्याच्या परिसरात शैक्षणिक गुणवत्तेचा आलेख वाढला, त्याबद्दल हा पुरस्कार जाहीर करण्यात आला आहे.
‘इंडियन टॅलेंट सर्च’ या संस्थेमार्फत यासाठी वर्षभराचे विद्यालयाचे शैक्षणिक मूल्यमापन करण्यात आले व त्यानंतर गुणवत्तेत व विविध निकषात बसल्यानंतर यंदाचा शिक्षण क्षेत्रातील राज्यस्तरीय ‘महाराष्ट्र समाज भूषण’ हा पुरस्कार मुधोजी हायस्कूल व ज्युनिअर कॉलेज, फलटण यांना जाहीर झाला आहे.
’महाराष्ट्र समाज भूषण’ पुरस्कार राज्याच्या मुख्यमंत्र्यांच्या हस्ते २४ सप्टेंबर २०२३ रोजी छत्रपती संभाजीनगर येथील कार्यक्रमप्रसंगी देऊन गौरविण्यात येणार आहे.
या पुरस्कारासोबतच मुख्याध्यापक व सर्व शिक्षकवृंदाना मुख्यमंत्र्यांच्या हस्ते सन्मानपत्र देऊन त्यांनाही सन्मानित करण्यात येणार आहे.
