समशेरसिंह नाईक निंबाळकरांचा साधेपणा नागरिकांच्या पसंतीस, नगराध्यक्षपदाची लढत चुरशीची !
स्थैर्य, फलटण, दि. २० नोव्हेंबर : फलटण नगरपालिका निवडणुकीतील नगराध्यक्षपदाचे उमेदवार समशेरसिंह नाईक निंबाळकर यांच्या प्रचाराने सध्या चांगलीच गती घेतली आहे. त्यांच्या कार्यकर्त्यांनी त्यांच्या नावासाठी आणि कामासाठी एक खास ‘टॅगलाईन’ वापरून जोरदार समर्थन सुरू केले आहे, ती म्हणजे ‘२४ तास ३६५ दिवस’! कार्यकर्त्यांच्या मते, समशेरसिंह यांचे नेतृत्त्व हे केवळ राजकीय नाही, तर जनतेला आपले वाटणारे, सहज उपलब्ध असणारे नेतृत्त्व आहे. याच टॅगलाईनच्या माध्यमातून ते थेट राजे गटाला आव्हान देत आहेत.
समशेरसिंह नाईक निंबाळकर यांनी आपल्या प्रचारात कोणताही मोठेपणा न ठेवता, सर्वसामान्य लोकांच्या थेट भेटी-गाठीवर भर दिला आहे. गल्लीबोळात फिरून ते मतदारांशी संवाद साधत आहेत. त्यांचा हा साधेपणा आणि सहज उपलब्धता लोकांना खूप आवडत आहे, हीच त्यांची सर्वात मोठी जमेची बाजू ठरत आहे. राजकारणातील बडेजाव बाजूला ठेवून, सर्वसामान्यांमध्ये मिसळून जाणारे नेतृत्व म्हणून त्यांची ओळख तयार झाली आहे, ज्यामुळे जनमानसात त्यांच्याबद्दल एक आपुलकीची भावना निर्माण झाली आहे.
कार्यकर्त्यांनी स्पष्ट केले आहे की, समशेरसिंह हे केवळ पद मिळवण्यासाठी नाही, तर फलटणचा सर्वांगीण विकास करण्याच्या उद्देशाने निवडणुकीत उतरले आहेत. शहरातील मूलभूत समस्या सोडवणे, विकासाला गती देणे आणि प्रत्येक नागरिकाला न्याय मिळवून देणे, हे त्यांचे मुख्य ध्येय आहे. माजी खासदार रणजितसिंह नाईक निंबाळकर यांच्या मार्गदर्शनाखाली, समशेरसिंह हे फलटणच्या विकासाचा एक नवा अध्याय सुरू करण्यासाठी सज्ज झाले आहेत.
एकंदरीत, ‘२४ तास ३६५ दिवस’ सेवेसाठी तयार असलेले समशेरसिंह नाईक निंबाळकर हे नगराध्यक्षपदाच्या निवडणुकीत अत्यंत प्रभावीपणे उतरले आहेत. त्यांचा साधेपणा, सहज उपलब्धता आणि विकास करण्याची तळमळ यावर फलटणकर किती विश्वास ठेवतात, यावर नगराध्यक्षपदाचा ‘राजमुकुट’ कोणाला मिळणार हे ठरणार आहे. ही निवडणूक आता दोन नाईक निंबाळकर घराण्यातील नेतृत्त्वाची परीक्षा घेणारी ठरणार आहे.
