सातारा-लातूर, पंढरपूर महामार्गाची कामे तातडीने पूर्ण करा
सातारा-लातूर व पंढरपूर महामार्गाची अर्धवट कामे प्राधान्याने पूर्ण करावीत, असे कडक निर्देश ग्रामविकास मंत्री जयकुमार गोरे यांनी प्रशासनाला दिले आहेत.
स्थैर्य, सातारा, दि. ३० मार्च : सातारा ते लातूर आणि सातारा ते पंढरपूर या दोन प्रमुख महामार्गांची काही ठिकाणी अर्धवट राहिलेली कामे रस्ते विकास महामंडळाने प्राधान्याने पूर्ण करावीत. या अपूर्ण कामांमुळे अपघात होऊन नागरिक जखमी होत असल्याने ही कामे तातडीने मार्गी लावावीत, असे निर्देश राज्याचे ग्रामविकास व पंचायतराज मंत्री जयकुमार गोरे यांनी दिले आहेत.
जिल्हाधिकारी कार्यालयात विशेष बैठक
सातारा ते लातूर आणि सातारा ते पंढरपूर महामार्गाच्या सद्यस्थितीबाबत जिल्हाधिकारी कार्यालयात एका विशेष बैठकीचे आयोजन करण्यात आले होते. या बैठकीला जिल्हाधिकारी संतोष पाटील, सार्वजनिक बांधकाम विभागाचे कार्यकारी अभियंता श्रीपाद जाधव आणि रस्ते विकास महामंडळाचे अधिकारी उपस्थित होते. यावेळी मंत्री जयकुमार गोरे यांनी अपूर्ण रस्त्यांच्या कामांबाबत अधिकाऱ्यांना कडक सूचना दिल्या.
अपघात रोखण्यासाठी तातडीच्या उपाययोजना
माण तालुक्यातील धुळदेव येथे अर्धवट रस्त्यामुळे मोठ्या प्रमाणात अपघात होत आहेत. हा रस्ता तातडीने पूर्ण करण्याच्या सूचना मंत्री गोरे यांनी दिल्या आहेत. तसेच, दिवड हद्दीतील पुलाचे काम पूर्ण होईपर्यंत रस्त्यावर डांबरीकरण करावे आणि पळशी येथील ५० मीटर लांबीचा अर्धवट रस्ता त्वरित डांबरीकरण करून पूर्ण करावा, असेही त्यांनी स्पष्ट केले.
शासकीय निकषांनुसार गतिरोधक बांधण्याच्या सूचना
गोंदवले बुद्रुक येथील ब्रह्मचैतन्य मंदिर ते शेतकरी भवन या मार्गावरील नियमापेक्षा उंच असलेले गतिरोधक काढून ते शासकीय निकषांनुसार नव्याने तयार करावेत. तसेच कोरेगाव तालुक्यातील चिमणगाव येथील ३० मीटरचा अपूर्ण रस्ता आणि सोलापूर जिल्ह्यातील पिलीव ते पंढरपूर या मार्गावरील अर्धवट कामांच्या ठिकाणी तातडीने डांबरीकरण करावे, असेही त्यांनी सांगितले.
“अर्धवट रस्त्यांच्या कामांमुळे अपघात होऊन नागरिक जखमी होत आहेत. ही अत्यंत गंभीर बाब असून रस्ते विकास महामंडळाने ही सर्व कामे प्राधान्याने आणि वेळेत पूर्ण करावीत,” असे निर्देश मंत्री जयकुमार गोरे यांनी दिले आहेत.
