शासकीय शिक्कामोर्तब! साहित्यिक सचिन गोसावींचे ‘आरोग्यातून यशाकडे’ पुस्तक आता ११ वी-१२ वीच्या विद्यार्थ्यांच्या भेटीला. MSCERT चा मोठा निर्णय. वाचा सविस्तर…

• प्रसिद्ध साहित्यिक सचिन गोसावींच्या पुस्तकाचा शासकीय योजनेत समावेश

• पीएमश्री आणि समग्र शिक्षा योजनेअंतर्गत अकरावी-बारावीच्या विद्यार्थ्यांना मिळणार लाभ

• ‘आरोग्यातून यशाकडे’ पुस्तकातून मिळणार आरोग्य साक्षरतेसह यशाचे धडे

स्थैर्य, फलटण, दि. ०१ डिसेंबर : प्रसिद्ध साहित्यिक आणि मोटिवेशनल व्याख्याते सचिन गोसावी यांच्या साहित्य प्रवासात एक मानाचा तुरा खोवला गेला आहे. त्यांच्या ‘आरोग्यातून यशाकडे’ या प्रेरणादायी पुस्तकाची निवड महाराष्ट्र शासनाच्या राज्य शैक्षणिक संशोधन व प्रशिक्षण परिषद, पुणे (MSCERT) मार्फत करण्यात आली आहे. सन २०२५ पासून हे पुस्तक पीएमश्री (PM SHRI) आणि समग्र शिक्षा योजनेअंतर्गत राज्यातील शासकीय तसेच आश्रम शाळांमधील इयत्ता अकरावी आणि बारावीच्या विद्यार्थ्यांसाठी शालेय ग्रंथालयात उपलब्ध होणार आहे.

विद्यार्थ्यांना मिळणार ‘आरोग्य साक्षरते’चे धडे

सचिन गोसावी यांचे हे पुस्तक केवळ यशाची गाथा नसून त्यात विद्यार्थ्यांच्या सर्वांगीण विकासाचा विचार करण्यात आला आहे. ध्येय निश्चिती, प्रयत्न, यश-अपयश पचवण्याची ताकद, सोशल मीडियाचा योग्य वापर आणि अत्यंत महत्त्वाची अशी ‘आरोग्य साक्षरता’ या विषयांचा यात समावेश आहे. विशेष म्हणजे, शासकीय आणि आश्रम शाळांमधील विद्यार्थ्यांना हे पुस्तक शासनामार्फत मोफत वाचता आणि अभ्यासता येणार आहे.

‘आरंभ है प्रचंड’ ते शासकीय निवड: एक यशस्वी प्रवास

मुळचे प्राथमिक शिक्षक असलेल्या सचिन गोसावी यांनी अध्यापनाचे कार्य करत असतानाच लेखन क्षेत्रातही आपला वेगळा ठसा उमटवला आहे. त्यांनी आतापर्यंत ७ प्रेरणादायी पुस्तके लिहिली आहेत. यापूर्वीचे त्यांचे ‘आरंभ है प्रचंड’ हे ललित गद्यपर पुस्तक प्रचंड गाजले असून, त्याची हजारो प्रतींची विक्री झाली आहे. या पुस्तकाला महाराष्ट्रासह देशभरातून मोठा प्रतिसाद मिळाला आहे.

व्याख्यानातून समाजप्रबोधन

केवळ लेखनच नव्हे, तर वाणीतूनही ते समाजपरिवर्तनाचे काम करत आहेत. समाजप्रबोधन आणि समाजपरिवर्तन हे ध्येय डोळ्यांसमोर ठेवून ते संपूर्ण महाराष्ट्रभर प्रेरणादायी व्याख्याने देत आहेत. त्यांच्या या व्याख्यानांना तरुणाईचा मोठा प्रतिसाद मिळत असून, त्यांना अनेक पुरस्कारांनी गौरविण्यात आले आहे.

आता त्यांच्या पुस्तकाचा थेट शालेय शिक्षणात संदर्भ ग्रंथ म्हणून समावेश झाल्याने सचिन गोसावी यांचे सर्व स्तरांतून अभिनंदन होत आहे.