श्रीमंत रामराजेंनी घेतली सह्याद्री कदम यांची भेट
दैनिक स्थैर्य | दि. २६ ऑक्टोबर २०२४ | फलटण |
विधान परिषदेचे माजी सभापती तथा आमदार रामराजे नाईक निंबाळकर, फलटण बाजार समितीचे अध्यक्ष श्रीमंत रघुनाथराजे नाईक निंबाळकर व जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांनी फलटण तालुक्याचे युवा नेते सह्याद्री चिमणराव कदम यांची त्यांच्या ‘सूर्या’ निवासस्थानी भेट घेतली. यावेळी ज्येष्ठ नेते अच्युतकाका खलाटे, ज्येष्ठ पत्रकार अरविंद मेहता आदी मान्यवर उपस्थित होते.
सह्याद्री कदम हे फलटणचे माजी आमदार स्व. चिमणराव ऊर्फ सूर्याजीराव शंकरराव कदम यांचे चिरंजीव आहेत. चिमणराव कदम फलटण विधानसभा मतदारसंघातून तीनवेळा आमदार झाले होते. फलटण विधानसभा निवडणुकीत स्व. चिमणराव कदम यांचा पराभव करून श्रीमंत रामराजे यांनी विधानसभेत पाऊल ठेवले होते. त्यामुळे श्रीमंत रामराजेंनी घरी जाऊन त्यांच्या पुत्राची भेट घेणे, हे विशेष मानले जात आहे.
फलटण तालुक्याचे युवा नेते असलेले सह्याद्री कदम वेगवेगळ्या सामाजिक उपक्रमांच्या माध्यमातून तरुणांमध्ये लोकप्रिय आहेत. त्यांच्या पाठीमागे मोठा तरुण मतदार असल्याने त्यांना आपल्या गोटात सामील करण्यासाठी श्रीमंत रामराजे व संपूर्ण राजे गटाच्या नेत्यांनी सह्याद्री कदम यांची त्यांच्या निवासस्थानी भेट घेतली आहे.
