राष्ट्रबंधू राजीव दिक्षीत गुरुकुलला सर्वतोपरी सहकार्य करणार : आ. सचिन पाटील
दैनिक स्थैर्य । 7 मे 2025। फलटण । लहानपणापासून आपल्यावर वारकरी सांप्रदायाचे संस्कार झाले आहेत. आपल्या मतदार संघातील या गुरुकुलचा आपल्याला निश्चित अभिमान आहे. या ठिकाणी विद्यार्थ्यांना नियमित शिक्षणाबरोबर अध्यात्मिक, कृषी, उद्योग, क्रीडा विषयक शिक्षण दिले जाते. विद्यार्थ्याला स्वतःच्या पायावर उभे करण्यासाठी ह.भ.प. बंडातात्या कराडकर यांच्या मार्गदर्शनाखाली सुरु असलेले प्रयत्न नव्या पिढीसाठी उपयुक्त आहे. या गुरुकुलला सर्वतोपरी मदत करण्याची ग्वाही आ. सचिन पाटील यांनी दिली.
राष्ट्रबंधू राजीव दीक्षित गुरुकुल व व्यसनमुक्त युवक संघ महाराष्ट्र मध्यवर्ती कार्यालय पिंप्रद, ता. फलटण येथे शुक्रवार दि. 3 ते बुधवार दि. 7 मे दरम्यान आयोजित सामुदायिक निळोबाराय गाथा पारायण व कीर्तन महोत्सवाचा शुभारंभात ते बोलत होते. यावेळी येथे 60 फूट उंचीचा ध्वज स्तंभ उभारणी व धर्मध्वजाचे पूजन करण्यात आले. यावेळी प्रमुख पाहुणे म्हणून आ. सचिन पाटील, पंढरपूर येथील ज्येष्ठ कीर्तनकार ह.भ.प. शंकर महाराज बडवे, अ‍ॅड. आशुतोष बडवे, व्यसनमुक्त युवक संघांचे संस्थापक युवक मित्र ह.भ.प. बंडातात्या कराडकर, व्यसनमुक्त युवक संघांचे अध्यक्ष दिपक जाधव, दशरथ बोबडे, ह.भ.प. नंदकुमार कुमठेकर, सिने कलाकार भरत शिंदे, यांच्यासह पंचक्रोशीतील सरपंच, उपसरपंच, सोसायटी चेअरमन अन्य मान्यवर, ग्रामस्थ, वाचक, भाविक उपस्थित होते.
आळंदी – पंढरपूर – महाड राष्ट्रीय महामार्ग (पालखी महामार्ग) ते पवारवाडी या रस्त्याच्या अपूर्ण कामाची पूर्तता करणार आहे. तसेच पवारवाडी ते नाईकबोमवाडी हा नव्याने मंजूर रस्ताही तातडीने पूर्ण करण्याचे आश्वासन दिले. या गुरुकुलातील सर्व सुविधा, शिक्षण पद्धती, येथील व्यवस्था मनाला समाधान देणारी आहे. या गुरुकुलचा आपल्याला सार्थ अभिमान असल्याची ग्वाही आ. सचिन पाटील यांनी दिली.
व्यसनमुक्त युवक संघांचे संस्थापक युवकमित्र ह.भ.प. बंडातात्या कराडकर यांनी सुमारे 12 वर्षांपूर्वी राष्ट्रबंधू राजीव दीक्षित गुरुकुलची स्थापना केली. या गुरुकुलात इयत्ता 5 वी ते 10 वीपर्यंत शिक्षण दिलेे जाते. यामध्ये विद्यार्थ्यांना पोहण्यासाठी जलतरण तलाव, व्यायाम, अभ्यासिका, संगणक लॅब, तबला, पेटी, मृदंग वाजविण्यासाठी मार्गदर्शन, आहारात संपूर्ण सेंद्रीय अन्न पदार्थ आणि दूध दिले जात असल्याचे व्यसन मुक्त युवक संघाचे अध्यक्ष दिपक जाधव यांनी सांगितले.
ह.भ.प. नंदकुमार कुमठेकर यांनी स्वागत केले. यावेळी सर्व मान्यवरांचा सन्मान करण्यात आला.
यावेळी ह.भ.प. शंकर महाराज बडवे व अ‍ॅड. आशुतोष बडवे यांनी भागवत धर्मध्वज व छत्रपती शिवाजी महाराज यांच्या इतिहासावर विचार व्यक्त केले.
या सोहळ्यात कीर्तनानंतर दररोज रात्री शासकीय अधिकारी यांच्याहस्ते आरती करण्यात येते, त्यामध्ये निवासी नायब तहसीलदार अभिजित जाधव, सहाय्यक निबंधक (सहकारी संस्था) जे. पी. गावडे व त्यांच्या सुविद्य पत्नी, गुणवरेचे माजी सरपंच सौ. शशिकला गावडे यांनी आरतीचा लाभ घेतला.
