मुलांना ‘स्क्रीन’वर मिळणाऱ्या आनंदापेक्षा ‘सानिध्यात’ ठेवा; इंद्रजीत देशमुख यांचा पालकांना मोलाचा सल्ला! प्रोग्रेसिव्ह कॉन्व्हेंटच्या ‘सुजाण पालकत्व’ कार्यशाळेला पालकांचा उदंड प्रतिसाद
सरस्वती शिक्षण संस्था संचलित प्रोग्रेसिव्ह कॉन्व्हेंट स्कूल अँड ज्युनियर कॉलेजच्या वतीने आयोजित ‘सुजाण पालकत्व’ कार्यशाळेत ज्येष्ठ वक्ते इंद्रजीत देशमुख (काकाजी) यांनी पालकांना सखोल मार्गदर्शन केले. मोबाईलच्या अतिवापराचे धोके सांगत त्यांनी पालक-पाल्य नात्यातील विश्वासाचे महत्त्व अधोरेखित केले.
स्थैर्य, कोळकी, दि. १८ फेब्रुवारी : आजच्या धावपळीच्या आणि तंत्रज्ञानाच्या युगात मुलांचे संगोपन हे पालकांसाठी एक मोठे आव्हान बनले आहे. मुलांच्या हातातून मोबाईल काढून त्यांच्याशी संवादाचे नाते कसे जोडावे, याविषयी पालकांना अंतर्मुख करणाऱ्या एका विशेष कार्यक्रमाचे आयोजन कोळकीत करण्यात आले होते. सरस्वती शिक्षण संस्था संचलित प्रोग्रेसिव्ह कॉन्व्हेंट स्कूल अँड ज्युनियर कॉलेजच्या वतीने ‘सुजाण पालकत्व’ या विषयावर आयोजित मार्गदर्शन कार्यशाळा मोठ्या उत्साहात आणि पालकांच्या उदंड प्रतिसादात संपन्न झाली.
कोळकी येथील अनंत मंगल कार्यालयात आयोजित या कार्यक्रमास प्रमुख मार्गदर्शक म्हणून शिवम प्रतिष्ठान (घारेवाडी, कराड) चे संस्थापक आणि सुप्रसिद्ध वक्ते श्री. इंद्रजीत देशमुख (काकाजी) उपस्थित होते. आपल्या ओघवत्या आणि हृदयाला भिडणाऱ्या शैलीत त्यांनी पालकांशी संवाद साधला. “आम्ही माणूस आहोत, तर माणुसकीचे जग तयार करणे गरजेचे आहे,” या विचाराने त्यांनी आपल्या मार्गदर्शनाची सुरुवात केली.
“सत्य परेशान होता है, मगर पराजित नही!”
आजच्या समाजातील दूषित प्रवाह आणि सोशल मीडियाचा मुलांवर होणारा परिणाम यावर काकाजींनी सविस्तर भाष्य केले. ते म्हणाले, “जग वाईटाचे आहे म्हणून सत्याचा विजय होत नाही असे नाही. सत्य परेशान होता है मगर पराजित नाही होता.” पालकांनी मुलांना सत्य, नीतीमूल्ये आणि सकारात्मकतेवर विश्वास ठेवायला शिकवावे. मुलांच्या नैसर्गिक गुणांचा आणि आवडीनिवडींचा सन्मान करा. त्यांना जसे आहेत तसे स्वीकारा आणि त्यांच्याशी सतत संवाद साधा, असे आवाहन त्यांनी केले.
मोबाईल आणि टीव्हीच्या अतिवापराचा धोका
मुलांमध्ये कमी होत चाललेली एकाग्रता ही चिंतेची बाब असल्याचे सांगत त्यांनी पालकांना सावध केले. “स्क्रीनवर मिळणाऱ्या आभासी आनंदापेक्षा मुलांना बाहेर फिरायला, खेळायला घेऊन जा. त्यांच्या सानिध्यात राहा आणि त्यांना विश्वासात घ्या,” असा व्यावहारिक आणि अत्यंत महत्त्वाचा सल्ला त्यांनी दिला. सलग दीड तास चाललेल्या या सत्राने उपस्थित पालकांना विचारप्रवण केले.
‘आदर्श माता-पिता’ पुरस्काराने गौरव
कार्यक्रमात शाळेच्या वतीने पालकांचा विशेष सन्मान करण्यात आला. यावेळी श्री. पांडुरंग पवार व सौ. सुलोचना पवार यांना काकाजींच्या हस्ते ‘आदर्श माता-पिता जीवनगौरव पुरस्कार’ प्रदान करण्यात आला. तसेच सौ. प्रतिभा पोळ व श्री. किरण पोळ, सौ. रेश्मा गोसावी व श्री. संदीप गोसावी, सौ. शिल्पा राजे व श्री. अविनाश राजे, सौ. शीतल चव्हाण व श्री. प्रवीण चव्हाण, सौ. सुनीता शिंदे व श्री. निलेश शिंदे, सौ. अश्विनी शेंडे व श्री. अरुण शेंडे आणि सौ. सविता भुजबळ व श्री. महादेव भुजबळ या पालकांना ‘आदर्श पालक पुरस्कार’ देऊन गौरवण्यात आले.
यावेळी प्राचार्य रविंद्र येवले, ज्येष्ठ पत्रकार अरविंद मेहता, प्रा. अर्जुन रूपनवर, प्रा. रवींद्र कोकरे, सौ. प्रियंका पवार, मोहन डांगे, सुशांत निंबाळकर, ऋषिकेश गायकवाड यांच्यासह विविध क्षेत्रातील मान्यवर आणि पालक मोठ्या संख्येने उपस्थित होते. कार्यक्रमाचे प्रास्ताविक संस्थेच्या व्यवस्थापकीय संचालिका संध्या गायकवाड यांनी केले. सूत्रसंचालन अहिल्या कवितके यांनी, तर आभार श्रीमती आशादेवी भराडे यांनी मानले. कार्यक्रम यशस्वी करण्यासाठी प्राचार्या सुजाता गायकवाड आणि शिक्षक व शिक्षकेतर कर्मचाऱ्यांनी विशेष परिश्रम घेतले.
