मराठी पत्रकार परिषदेच्या फलटण तालुकाध्यक्षपदी प्रा.रमेश आढाव

दैनिक स्थैर्य । दि. 02 जुलै 2021 । फलटण । मराठी पत्रकार परिषदेच्या फलटण तालुका अध्यक्षपदी येथील जेष्ठ पत्रकार प्रा.रमेश आढाव यांची बिनविरोध निवड करण्यात आली.

फलटण येथील शासकीय विश्रामगृहात दादासाहेब चोरमले यांच्या अध्यक्षतेखाली पत्रकारांची बैठक नुकतीच संपन्न झाली. सदर बैठकीत अध्यक्षपदासाठी प्रा.रमेश आढाव यांच्या नावाची सूचना यशवंत खलाटे (पाटील) यांनी केली असता त्याला विक्रम चोरमले यांनी अनुमोदन दिल्यानंतर उपस्थित सर्व पत्रकारांनी सदर निवडीला संमती दिली.

सदर निवडीनंतर प्रा.रमेश आढाव यांची फलटण तालुका अध्यक्षपदी नियुक्ती करण्यासंदर्भाचे विनंती पत्र व ठराव मराठी पत्रकार परिषदेचे सातारा जिल्हाध्यक्ष हरीष पाटणे यांना सातारा येथे समक्ष भेटून देण्यात आला असून सदर निवडीला लवकरच संघटनेची अधिकृत मान्यता घेतली जाईल, असे सांगून हरीष पाटणे यांनी प्रा.रमेश आढाव यांचे अभिनंदन केले. यावेळी जेष्ठ मार्गदर्शक शरद काटकर, विनोद कुलकर्णी, दीपक प्रभावळकर, यशवंत खलाटे पाटील, युवराज पवार, विक्रम चोरमले, शक्ती भोसले उपस्थित होते.