ब्लुम इंग्लिश मिडीयमची गुणवरेत “हर घर तिरंगा” अंतर्गत प्रभातफेरी
दैनिक स्थैर्य । दि. १३ ऑगस्ट २०२२ । फलटण । गुणवरे ता. फलटण जिल्हा सातारा येथील ब्लूम इंग्लिश मीडियम स्कूल अँड ज्युनिअर कॉलेज या विद्यालयातील विद्यार्थ्यांनी स्वातंत्र्याच्या अमृत महोत्सवानिमित्त हर घर तिरंगा उपक्रमाच्या जनजागृतीसाठी गुणवरे गावातून प्रभात फेरी काढली.
शाळेतील सर्व विद्यार्थी गावातील भैरवनाथ मंदिर येथे जमा झाल्यानंतर राष्ट्रगीत म्हणून प्रभात फेरीला सुरुवात झाली. ढोल, ताशा व लेझीम पथकाने सर्व परिसर दणाणून टाकला. या प्रभात फेरी दरम्यान विद्यार्थ्यांनी हर घर तिरंगा घर घर तिरंगा, भारत माता की जय, वंदे मातरम, समानतेची वाहील गंगा प्रत्येक घरावर फडकवू तिरंगा, अशा विविध घोषणा देत व हातात बॅनर घेत संपूर्ण गावातून प्रभात फेरी काढल्याने गावात देशभक्तीपर वातावरण निर्माण झाले.
प्रभात फेरीचा शेवट वंदे मातरम या राष्ट्रीय गीताने करण्यात आला. संस्थेच्या सचिव सौ. साधनाताई गावडे यांच्या मार्गदर्शनाखाली शाळेचे प्राचार्य श्री गिरीधर गावडे व सर्व शिक्षक, शिक्षिका, शिक्षकेतर कर्मचारी, ड्रायव्हर्स यांनी प्रभात फेरीच्या यशस्वीते करिता प्रयत्न केले.
