पोलीस अधिकारी हणमंत काकंडकी यांना सर्वोच्च न्यायालयाकडून जामीन मंजूर

दैनिक स्थैर्य । दि. १९ नोव्हेंबर २०२२ । सातारा । संशयिताचा पोलीस कोठडीत मृत्यू झाल्याने अटकेत असलेले पोलीस अधिकारी हणमंत काकंडकी यांना सर्वोच्च न्यायालयाने जामीन मंजूर केला आहे.

कराड शहर पोलिसांनी सोलापूर जिल्हा निंभोरे गावातील सोने व्यापारी रावसाहेब जाधव (42) याला चोरीत सहभागी असल्याच्या संशयावरून ताब्यात घेतले होते. दुसर्‍या दिवशी 17 जून 2016 रोजी पोलीस कोठडीत असतानाच त्याचा मृत्यू झाला होता.
सविस्तर माहिती अशी की, मुंबईतील गोरेगाव येथील विक्रम श्रीमल जैन या सोने व्यापार्‍याने 12 मे रोजी खंडाळा पोलिस ठाण्यात नोंदवलेल्या तक्रारीवरून पोलिसांनी रावसाहेब जाधव यांना तपासाचा भाग म्हणून ताब्यात घेतले होते. जैन यांनी पोलिसांना अडीच किलो सोन्याचे दागिने आणि 2.2 लाख रुपयांचे दागिने असल्याचे सांगितले होते. कोल्हापूर ते मुंबई या खासगी लक्झरी बसमधून प्रवास करत असताना एकूण 77 लाख रुपयांची रोकड चोरीला गेली असल्याचे संशय होता. कराड येथील बसमधून उतरलेल्या तिघांचा या चोरीत सहभाग असल्याचा संशय त्यांनी व्यक्त केला होता.

कराड येथे याच बसमधून खाली उतरलेल्यांवर पोलिसांना संशय असल्याने हे प्रकरण कराड पोलिसांकडे पाठवण्यात आले होते. त्यांनी जाधव यांना सोलापूर येथील त्यांच्या राहत्या घरातून उचलले होते व कराड येथे आणले होते. पोलीस चौकशी दरम्यान आणि रिमांड दरम्यान त्याचा मृत्यू झाला होता. या प्रकरणातील संशयित पोलिसांनी अटकपूर्व जामीन मिळवण्यासाठी न्यायालयात याचिका दाखल केली होती. न्यायालयाने त्यांची याचिका फेटाळल्यानंतर 27 डिसेंबर 2016 रोजी वरिष्ठ पोलीस निरीक्षक विकास धस आणि पोलीस अधिकारी व डीबी विभागाचे प्रमुख हणमंत काकंडकी यांसह सर्व 12 संशयितांना अटक करण्यात आली होती.