पीएम किसान योजनेत मोठे बदल; एकाच कुटुंबातील पिता-पुत्राला मिळतील हप्ते !
थेट WhatsApp वर मिळवा
पीएम किसान सन्मान निधी योजनेत एकाच कुटुंबातील पिता-पुत्राला हप्ता मिळणार की नाही, याबाबत केंद्र सरकारने नियमावली स्पष्ट केली आहे.
स्थैर्य, सातारा, दि. ०४ ऑक्टोबर : पीएम किसान सन्मान निधी योजनेअंतर्गत केंद्र सरकारकडून अल्पभूधारक शेतकऱ्यांना दरवर्षी ६ हजार रुपयांची आर्थिक मदत दिली जाते. मात्र, एकाच कुटुंबातील बाप आणि मुलगा या दोघांनाही या योजनेचा लाभ मिळू शकतो का, असा प्रश्न अनेक शेतकऱ्यांकडून विचारला जात आहे. या संदर्भात केंद्र सरकारने नियमावली स्पष्ट केली असून, नियमांचे उल्लंघन करून लाभ घेतल्यास वसुलीची कारवाई करण्याचा इशारा दिला आहे.
कुटुंबातील एकाच व्यक्तीला मिळणार लाभ
केंद्र सरकारच्या नियमांनुसार, पीएम किसान योजनेचा लाभ एका कुटुंबातील एकाच पात्र सदस्याला दिला जातो. पती, पत्नी आणि अल्पवयीन मुले मिळून एक कुटुंब मानले जाते. जर पिता आणि मुलगा एकाच रेशन कार्डवर असतील आणि शेतीची जमीन संयुक्त नावे असेल, तर दोघांनाही या योजनेचा हप्ता मिळू शकत नाही. अशा परिस्थितीत कुटुंबातील केवळ एकाच व्यक्तीला २ हजार रुपयांचा हप्ता मिळण्यास मंजुरी दिली जाते.
वेगळी नोंद अन् नियमांची पूर्तता आवश्यक
मुलाचे लग्न झाले असेल आणि त्याच्या नावे स्वतंत्र रेशन कार्ड तसेच स्वतःच्या नावावर शेतीची स्वतंत्र नोंद (सातबारा) असेल, तरच तो या योजनेसाठी वेगळा अर्ज करू शकतो. अपात्र असतानाही चुकीची माहिती देऊन किंवा कागदपत्रांची फेरफार करून योजनेचा लाभ घेतल्याचे आढळल्यास, आतापर्यंत दिलेले सर्व हप्ते सरकारकडून वसूल केले जातात. त्यामुळे शेतकऱ्यांनी योजनेसाठी अर्ज करताना ई-केवायसी (e-KYC) आणि आधार सीडिंगची प्रक्रिया पूर्ण करणे अनिवार्य आहे.
