मनोज जरांगे पाटलांच्या ‘चलो मुंबई’ला फलटण तालुक्याचा एल्गार; हजारो मराठा बांधव मुंबईकडे रवाना

स्थैर्य, फलटण, दि. २८ ऑगस्ट : मराठा आरक्षणाचे संघर्षयोद्धे मनोज जरांगे पाटील यांनी दिलेल्या ‘चलो मुंबई’च्या नाऱ्याला प्रतिसाद देत, फलटण तालुक्यातील हजारो मराठा बांधव आज, दि. २८ ऑगस्ट रोजी मुंबईच्या दिशेने रवाना झाले आहेत. मराठा समाजाला ओबीसी प्रवर्गातून आरक्षण मिळावे, या प्रमुख मागणीसाठी जरांगे पाटील यांच्या आंदोलनाला पाठिंबा देण्यासाठी संपूर्ण तालुक्यातून उत्स्फूर्त प्रतिसाद मिळाला आहे.

मराठा समाजाच्या हक्कासाठी मनोज जरांगे पाटील यांनी उभारलेल्या लढ्याच्या अंतिम टप्प्याला निर्णायक स्वरूप देण्यासाठी त्यांनी दि. २७ ऑगस्ट रोजी अंतरवाली सराटी येथून मुंबईकडे कूच केले आहे. दि. २९ ऑगस्ट रोजी ते मुंबईतील आझाद मैदानावर आमरण उपोषणास बसणार आहेत. त्यांच्या या आंदोलनाची धग कायम ठेवण्यासाठी आणि सरकारवर दबाव निर्माण करण्यासाठी फलटण तालुक्यातील मराठा समाज एकवटला आहे.

गेले आठ दिवस मराठा क्रांती मोर्चा, फलटण आणि अखंड मराठा समाज यांच्या समन्वयकांनी शहर आणि ग्रामीण भागात जनजागृती मोहीम राबवून “आता कुठे जायचं? मुंबईला जायचं!” हा नारा घराघरात पोहोचवला. या आवाहनाला प्रतिसाद देत, आज सकाळी छत्रपती शिवाजी महाराज चौक येथे महाराजांना अभिवादन करून हजारो वाहनांचा भव्य ताफा मुंबईकडे मार्गस्थ झाला.

“आरक्षण घेतल्याशिवाय मुंबई सोडायची नाही,” असा निर्धार यावेळी मराठा क्रांती मोर्चाच्या समन्वयकांनी व्यक्त केला. मनोज जरांगे पाटील यांच्या नेतृत्वाखाली फलटण तालुक्यातील मराठा समाज पूर्ण ताकदीनिशी एकवटला असून, जोपर्यंत मागणी मान्य होत नाही, तोपर्यंत मुंबईतच ठाण मांडण्याचा निश्चय कार्यकर्त्यांनी केला आहे.