आषाढी वारीनिमित्त फलटणमधून निघणार सायकल वारी

दैनिक स्थैर्य | दि. 17 जुन 2025 | फलटण | फलटण येथील सायकल प्रेमींनी २१ जून २०२५ मध्ये पंढरपूरसाठी धार्मिक भक्ती सोबतच सायकलवारीचे आयोजन केले आहे. आषाढी एकादशीनिमित्त पंढरपूरला पोहोचण्यासाठी अनेक वारकरी पायी वारी करतात. या वर्षी फलटण रायडर्सने सायकलच्या माध्यमातून पंढरपूरच्या दर्शनासाठी प्रस्थान ठेवले आहे. या वारीत १२ ते ७२ वर्षे वयाच्या सायकल पटूंचा सहभाग आहे.

फलटण रायडर्सची ही पहिलीच सायकल वारी आहे. या वारीसाठी २१ जूनला पहाटे पाच वाजता फलटणहून प्रस्थान होत आहे. पहिला थांबा शिंगणापूर फाटा आणि दुसरा थांबा कुडूस येथे असेल. वारी दरम्यान सर्व सायकल पटू भोजन व विश्रांतीसाठी चिंचणी ग्रामीण कृषी पर्यटन केंद्र येथे थांबतील. ही वारी सायंकाळी पाच वाजेपर्यंत पंढरपूरला पोहोचणार आहे.

फलटण रायडर्सच्या सायकल वारीमुळे भक्ती आणि सायकलच्या आवडीचा अनोखा संयोग घडत आहे. यामध्ये सहभागी होणाऱ्या सायकल प्रेमींना पंढरपूरच्या दर्शनाचा आनंद घेता येईल. ही वारी धार्मिक भावनांबरोबरच सायकलच्या प्रेमाचा वाढता प्रवास दर्शवत आहे.