फलटण पंचायत समितीत सत्तेची चावी ‘ईश्वरी चिठ्ठी’वर; सभापतीपद ओबीसी महिलेसाठी राखीव! ‘या’ ५ महिला सदस्यांपैकी कोणाच्या गळ्यात पडणार माळ?

फलटण पंचायत समितीत ८-८ ने बरोबरी झाल्याने सभापतीपदाचा फैसला आता चिठ्ठीवर होणार. सभापतीपद ओबीसी महिला प्रवर्गासाठी राखीव. राजे गट आणि खासदार गटातील ५ महिला सदस्य शर्यतीत. वाचा सविस्तर नावे…

स्थैर्य, फलटण, दि. 10 फेब्रुवारी : फलटण पंचायत समितीच्या सार्वत्रिक निवडणुकीत (Phaltan Panchayat Samiti Election 2026) महायुती (खासदार गट) आणि राजे गट (शिवसेना) या दोन्ही गटांचे ८-८ सदस्य निवडून आल्याने पंचायत समितीमध्ये अभूतपूर्व परिस्थिती निर्माण झाली आहे. दोन्ही गटांकडे समसमान संख्याबळ असल्याने आता सत्तेची चावी आणि सभापतीपदाचा फैसला हा नशिबावर म्हणजेच ‘ईश्वरी चिठ्ठी’वर (Draw of Lots) अवलंबून असणार आहे.

विशेष म्हणजे, आगामी काळासाठी फलटण पंचायत समितीचे सभापतीपद हे नागरिकांचा मागास प्रवर्ग (महिला) अर्थात ओबीसी महिला (OBC Woman) या प्रवर्गासाठी राखीव झाले आहे. त्यामुळे दोन्ही गटांकडून या प्रवर्गातील कोणकोणते उमेदवार निवडून आले आहेत आणि कोणाच्या गळ्यात सभापतीपदाची माळ पडू शकते, याची उत्सुकता शिगेला पोहोचली आहे.

राजे गट विरुद्ध खासदार गट: सभापतीपदासाठी कोण आहेत दावेदार?

राखीव प्रवर्गानुसार आणि विजयी उमेदवारांच्या जातनिहाय वर्गवारीनुसार, सध्या दोन्ही गटांत मिळून एकूण ५ महिला सदस्य या पदासाठी पात्र ठरत आहेत. यामध्ये राजे गटाकडे (शिवसेना) ३ तर खासदार गटाकडे (महायुती) २ दावेदार आहेत.

१. खासदार गट (महायुती) – दावेदार:

या गटाकडे सभापतीपदासाठी प्रबळ दावेदार म्हणून दोन नावे चर्चेत आहेत:

शिवांजली विक्रमसिंह भोसले (राष्ट्रवादी काँग्रेस): साखरवाडी-पिंपळवाडी गणातून विजयी. हा गण ‘नागरिकांचा मागास प्रवर्ग (महिला)’ साठी राखीव होता. शिवांजलीराजे भोसले या राजकीय घराण्यातील असून त्यांचे नाव आघाडीवर आहे.
शुभांगी तुकाराम शिंदे (भाजपा): वाठार निंबाळकर गणातून विजयी. जरी हा गण ‘सर्वसाधारण महिला’ प्रवर्गासाठी होता, तरी शुभांगी शिंदे या ओबीसी प्रवर्गातील असल्याने त्या सभापतीपदासाठी पात्र ठरत आहेत.

२. राजे गट (शिवसेना) – दावेदार:

राजे गटाकडे संख्याबळानुसार तीन पर्याय उपलब्ध आहेत:

सौ. पुष्पा रामचंद्र चोपडे (शिवसेना): सांगवी गणातून विजयी. हा गण ‘नागरिकांचा मागास प्रवर्ग (महिला)’ साठी राखीव होता.
आटोळे स्वाती हणमंत (शिवसेना): बरड गणातून विजयी. हा गण ‘सर्वसाधारण महिला’ म्हणून लढवला गेला असला तरी स्वाती आटोळे या ओबीसी महिला प्रवर्गातून येतात.
सौ. विजया हनुमंत सोनवलकर (शिवसेना): दुधेबावी गणातून विजयी. दुधेबावी गण हा ‘सर्वसाधारण महिला’ साठी होता, मात्र विजया सोनवलकर या ओबीसी प्रवर्गातील आहेत.

‘टाय’ झाल्याने चिठ्ठीवरच मदार

सध्याचे बलाबल पाहता दोन्ही बाजूने ८-८ सदस्य आहेत. सभापती निवडीच्या वेळी जर दोन्ही बाजूने समान मते पडली, तर नियमानुसार चिठ्ठी टाकून निवड केली जाईल. त्यामुळे आता नशीब कोणाला साथ देणार?