फलटणचे ‘बिहार’ होऊ देणार नाही; रामराजेंचा विरोधकांवर हल्लाबोल
फलटण शहराचे ‘बिहार’ करण्याचा काहींचा प्रयत्न असून ही दहशत मोडून काढा, असे आवाहन रामराजे नाईक निंबाळकर यांनी केले. नगरपरिषद निवडणुकीत महायुतीचा प्रचार शिगेला.
स्थैर्य, फलटण, दि. १७ डिसेंबर : फलटण नगरपरिषदेच्या आगामी निवडणुकीच्या पार्श्वभूमीवर ब्राह्मण गल्ली येथील सभेत रामराजे नाईक निंबाळकर यांनी विरोधकांचा खरपूस समाचार घेतला. शहरात दहशतीचे वातावरण निर्माण करून फलटणचे ‘बिहार’ करण्याचा काहींचा प्रयत्न असून ही प्रवृत्ती हद्दपार करण्यासाठी महायुतीच्या पाठीशी उभे राहा, असे आवाहन त्यांनी मतदारांना केले.
प्रभाग क्रमांक ४ आणि ८ मधील महायुती (शिवसेना- शिंदे गट) च्या उमेदवारांच्या प्रचारार्थ ब्राह्मण गल्ली येथे कोपरा सभा आयोजित करण्यात आली होती. यावेळी बोलताना रामराजे यांनी शहरात सुरू असलेल्या कथित दहशतीच्या राजकारणावर बोट ठेवले. ते म्हणाले,
“काही लोक सत्तेचा वापर करून खोट्या केसेस, ३०७ सारखी कलमे आणि तडीपारीच्या माध्यमातून कार्यकर्त्यांवर आणि सामान्य नागरिकांवर दहशत निर्माण करत आहेत. पण लक्षात ठेवा, ही हुकूमशाही आणि दहशत आम्ही मोडून काढू.”
विकासाचा मुद्दा आणि विरोधकांवर प्रहार
“मी येथे मार्गदर्शन करायला नाही, तर मन मोकळं करायला आलोय,” असे सांगत रामराजे यांनी गेल्या ३० वर्षांतील विकासाचा आढावा घेतला. धोम-बलकवडीचे पाणी, एमआयडीसी आणि शिक्षण संस्थांमधील प्रगतीचा त्यांनी उल्लेख केला.
विरोधकांवर टीका करताना ते म्हणाले,
“ज्यांनी स्वतःच्या पतसंस्था बुडवून ठेवीदारांना देशोधडीला लावले, त्यांनी आम्हाला विकासाचे प्रश्न विचारू नयेत. ‘कमिन्स’ (Cummins) सारख्या कंपनीला टाळे लावण्याची भाषा करणाऱ्यांनीच फलटणच्या औद्योगिक विकासात अडथळे आणले आहेत.”
कायदा व सुव्यवस्थेचा प्रश्न
या सभेत कृषी उत्पन्न बाजार समितीचे सभापती रघुनाथराजे नाईक निंबाळकर यांनी शहरातील कायदा व सुव्यवस्थेवर चिंता व्यक्त केली. त्यांनी संपदा मुंडे मृत्यू प्रकरणाचा उल्लेख करत सांगितले की, “फलटण हे सईबाई महाराणींचे गाव आहे. या गावाला अशा दुर्दैवी घटनांमुळे ओळखले जाणे चुकीचे आहे.”
तसेच फलटण, जाधववाडी, कोळकीचा विकास झाला असून मलटणचा विकास स्थानिक नेत्यांच्या द्वेषपूर्ण राजकारणामुळे खुंटल्याचा दावाही रघुनाथराजे यांनी केला.
अनिकेतराजेंच्या नेतृत्वावर भर
सभेतील इतर वक्त्यांनी नगराध्यक्षपदाचे उमेदवार अनिकेतराजे नाईक निंबाळकर यांच्या समर्थनाचे आवाहन केले. “अनिकेतराजे हे शांत, संयमी आणि उच्चशिक्षित नेतृत्व आहे. शहराचे जहाज सुरक्षितपणे पुढे नेण्यासाठी त्यांच्या हाती सुकाणू देणे गरजेचे आहे,” असे मत सत्यजित घोरपडे यांनी व्यक्त केले. यावेळी संतोष बिचुकले यांनीही आपल्या शैलीत विरोधकांवर टीका केली.
इस्टोनियात यश मिळवलेल्या विद्यार्थ्यांचा सत्कार
राजकीय भाषणांसोबतच इस्टोनिया येथे झालेल्या आंतरराष्ट्रीय रोबोटिक्स स्पर्धेत यश मिळवलेल्या फलटणच्या गुणवंत विद्यार्थ्यांचा रामराजे यांच्या हस्ते विशेष सत्कार करण्यात आला.
सभेला माजी आमदार दीपक चव्हाण, रघुनाथराजे नाईक निंबाळकर यांच्यासह नागरिक मोठ्या संख्येने उपस्थित होते.
