फलटण नगरपालिका मतदार यादी: हरकतींवरील सुनावणी २७ व २८ ऑक्टोबर रोजी
स्थैर्य, फलटण, दि. २५ ऑक्टोबर : फलटण नगरपरिषदेच्या आगामी सार्वत्रिक निवडणुकीसाठी प्रसिद्ध करण्यात आलेल्या प्रभागनिहाय प्रारूप मतदार यादीवर प्राप्त झालेल्या हरकतींवर सुनावणी घेण्यासाठी वेळापत्रक जाहीर करण्यात आले आहे. ही सुनावणी सोमवार, दि. २७ ऑक्टोबर आणि मंगळवार, दि. २८ ऑक्टोबर २०२५ रोजी उपविभागीय अधिकारी कार्यालयात होणार आहे.
फलटण नगरपरिषदेची पंचवार्षिक निवडणूक – २०२५ लवकरच अपेक्षित असून, त्याअनुषंगाने प्रभागनिहाय प्रारूप मतदार यादी ८ ऑक्टोबर २०२५ रोजी प्रसिद्ध करण्यात आली होती. या यादीवर अनेक मतदार आणि हरकतदारांनी विविध आक्षेप नोंदवले आहेत. या सर्व हरकतींची शहानिशा करण्यासाठी आणि संबंधितांना त्यांचे म्हणणे मांडण्याची संधी देण्यासाठी ही सुनावणी आयोजित करण्यात आली आहे.
सुनावणीचे ठिकाण उपविभागीय अधिकारी यांचे दालन, उपविभागीय अधिकारी कार्यालय, फलटण हे निश्चित करण्यात आले आहे. वेळापत्रकानुसार, सोमवार, २७ ऑक्टोबर रोजी सकाळी ९ ते दुपारी १२ या वेळेत प्रभाग क्रमांक १ ते ३ मधील हरकतींवर सुनावणी होईल. त्याच दिवशी दुपारी २ ते सायंकाळी ५ या वेळेत प्रभाग क्रमांक ४ ते ६ साठी सुनावणी पार पडेल.
मंगळवार, २८ ऑक्टोबर रोजी सकाळी ९ ते दुपारी १२ या वेळेत प्रभाग क्रमांक ७ ते ९ मधील हरकतींवर सुनावणी घेण्यात येईल. तर, दुपारी २ ते सायंकाळी ५ या वेळेत प्रभाग क्रमांक १० ते १३ मधील हरकतींवर सुनावणी होणार आहे.
ज्या मतदारांनी किंवा हरकतदारांनी प्रारूप मतदार यादीवर आक्षेप नोंदवले आहेत, त्यांनी या वेळापत्रकानुसार नमूद केलेल्या ठिकाणी आणि वेळी सुनावणीसाठी उपस्थित राहावे, असे आवाहन करण्यात आले आहे. आपले म्हणणे मांडताना योग्य त्या कागदपत्रांची पूर्तता करणे आवश्यक आहे.
या सुनावणीस हरकतदार अनुपस्थित राहिल्यास, त्यांचे यावर काहीही म्हणणे नाही असे गृहीत धरून नियमोचित निर्णय घेण्यात येईल, याची नोंद घेण्याचे आवाहन फलटण नगरपरिषदेचे मुख्याधिकारी निखिल जाधव यांनी एका जाहीर सूचनेद्वारे केले आहे.
