पूर्ण वेळ प्रांताधिकारी नियुक्त करा ! : फलटण नागरिकांची मागणी
दैनिक स्थैर्य | दि. ०१ फेब्रुवारी २०२५ | फलटण | फलटण उपविभागातील नागरिकांना एक महत्वाचा प्रश्न सध्या सतावत आहे – फलटणला पूर्ण वेळ प्रांताधिकारी कधी मिळणार ? हा प्रश्न त्यामुळे उपस्थित झाला आहे की फलटणचे उपविभागीय अधिकारी तथा प्रांताधिकारी सचिन ढोले यांची महसूलमंत्री चंद्रशेखर बावनकुळे यांच्या विशेष कार्यकारी अधिकारी पदी नियुक्ती झाल्यानंतर, फलटणचा प्रांताधिकारी पदाचा अतिरिक्त चार्ज सातारा विशेष भूसंपादन अधिकारी अभिजित पाटील यांच्याकडे देण्यात आला आहे.
सचिन ढोले यांनी फलटण उपविभागाचे प्रांताधिकारी म्हणून कार्य केले होते, त्यांच्या कार्यकाळात त्यांनी नागरिकांच्या विविध समस्यांवर तातडीने कार्यवाही करून नागरिकांचा विश्वास संपादन केला होता. मात्र, त्यांची बदली झाल्यानंतर, फलटणच्या प्रांताधिकारी पदी अद्याप नवीन नियुक्ती करण्यात आली नाही. यामुळे नागरिकांमध्ये असंतोष वाढत आहे.
सातारा विशेष भूसंपादन अधिकारी अभिजित पाटील यांच्याकडे फलटणचा अतिरिक्त चार्ज देण्यात आला आहे, मात्र ही व्यवस्था केवळ तात्पुरती आहे. अतिरिक्त चार्ज असल्याने कार्याची गती मंद होत आहे आणि नागरिकांच्या समस्यांचे निराकरण होण्यात विलंब होत आहे. नागरिकांना पूर्ण वेळ प्रांताधिकारी नसल्याने त्यांच्या तक्रारी व अर्जांवर तातडीने कार्यवाही होण्यात अडचणी येत आहेत.
फलटणच्या नागरिकांनी आणि स्थानिक नेत्यांनी पूर्ण वेळ प्रांताधिकारी नियुक्त करण्याची मागणी केली आहे. त्यांच्या मते, पूर्ण वेळ प्रांताधिकारी असल्याने कार्याची पारदर्शकता वाढेल आणि नागरिकांच्या समस्यांचे निराकरण जलद होईल.
