वाहतूक कोंडीचा विळखा! फलटण-दहिवडी रस्त्यावरील पुलाच्या कामामुळे नागरिकांना मनस्ताप; अपघातांची मालिका टाळण्यासाठी ‘स्मार्ट’ फलटणकरांना पर्यायी मार्गाचा ‘इशारा’
फलटण-दहिवडी रस्त्यावरील खडकहिरा व कोळकी येथील पुलाच्या कामामुळे शहराच्या वेशीवर मोठी वाहतूक कोंडी होत असून, आरटीओ ऑफिसजवळ अपघातांचे प्रमाण वाढले आहे. या मनस्तापातून वाचण्यासाठी नागरिकांनी तातडीने पर्यायी मार्गांचा वापर करणे गरजेचे बनले आहे.
स्थैर्य, फलटण, दि. १३ फेब्रुवारी : फलटण-दहिवडी या अत्यंत वर्दळीच्या रस्त्याचे काम सध्या युद्धपातळीवर सुरू असून, विकासाच्या या प्रक्रियेत सध्या तरी फलटणकरांना मोठ्या वाहतूक कोंडीचा आणि मनस्तापाचा सामना करावा लागत आहे. विशेषतः शहराच्या हद्दीवर असलेल्या खडकहिरा आणि कोळकी येथील बुवासाहेब मंदिराजवळील ओढ्यावर नवीन मोठ्या पुलांचे काम जोरात सुरू आहे. मात्र, या कामामुळे निर्माण झालेल्या ‘बॉटलनेक’मुळे वाहतुकीचा पार बोजवारा उडाला असून, नागरिकांच्या सुरक्षिततेचा मोठा प्रश्न ऐरणीवर आला आहे.
सध्या मुख्य पुलाचे काम सुरू असल्याने, वाहतूक सुरळीत राहण्यासाठी पुलाच्या शेजारीच पाईप टाकून एक तात्पुरता कच्चा मार्ग तयार करण्यात आला आहे. मात्र, या अरुंद आणि कच्च्या पर्यायी मार्गावर वाहनांची प्रचंड गर्दी होत असल्याने येथे दररोज वाहतूक कोंडीचा भयंकर विळखा पाहायला मिळत आहे. विशेषतः सकाळच्या वेळी शाळा-महाविद्यालयांची वेळ आणि सायंकाळी कामावरून घरी परतणाऱ्या चाकरमान्यांच्या गर्दीमुळे या मार्गावर वाहनांच्या लांबच लांब रांगा लागत आहेत.
अपघातांची मालिका सुरू! दुर्लक्ष की नागरिकांची घाई?
या सातत्यपूर्ण वाहतूक कोंडीचे रूपांतर आता अपघातांमध्ये होऊ लागले आहे. फलटण आरटीओ ऑफिस (जुने गर्ल्स हॉस्टेल) या परिसरात वाहतुकीच्या गोंधळामुळे दररोज छोटे-मोठे अपघात घडत आहेत. वाहनांची एकमेकांना धडक बसणे, दुचाकीस्वार घसरून पडणे अशा घटनांमुळे प्रवाशांच्या जिवावर बेतण्याची शक्यता निर्माण झाली आहे. या वाढत्या अपघातांमुळे या परिसरातून प्रवास करणे आता जिकिरीचे बनले आहे.
‘स्मार्ट’ फलटणकरांनो, पर्यायी मार्गाचा वापर करा!
या रोजच्या ट्रॅफिक जाम आणि अपघातांच्या मालिकेपासून बचाव करण्यासाठी आता खुद्द नागरिकांनीच ‘स्मार्ट’ विचार करण्याची गरज निर्माण झाली आहे. कोळकी भागामधून जर फलटण शहरात प्रवेश करायचा असेल किंवा शहरातून कोळकीकडे जायचे असेल, तर नागरिकांनी या धोकादायक आणि वेळखाऊ मार्गाऐवजी पर्यायी मार्गांचा अवलंब करावा. यासाठी ‘अनंत मंगल कार्यालय’ किंवा ‘महाराजा मंगल कार्यालय’ या रस्त्यांचा वापर करणे अत्यंत सोयीचे आणि सुरक्षित ठरणार आहे.
प्रशासनाने पुलाचे काम लवकरात लवकर पूर्ण करावे, अशी मागणी होत असली तरी, तोपर्यंत स्वतःचा वेळ आणि जीव वाचवण्यासाठी नागरिकांनीच पर्यायी मार्गांचा ‘स्मार्ट’ वापर करून संभाव्य धोके टाळावेत, असा स्पष्ट ‘इशारा’ आता दिला जात आहे.
