फलटण शहरात मोटारसायकल चोरणारे दोन आरोपी जेरबंद; शहर पोलिसांची धडक कारवाई, चोरीची स्कूटी व गुन्ह्यात वापरलेली दुचाकी जप्त
फलटण शहरातील कसबा पेठ परिसरातून चोरीला गेलेल्या होंडा ॲक्टिव्हा स्कूटीचा शहर पोलिसांनी कौशल्याने छडा लावला असून, याप्रकरणी दोन आरोपींना अटक केली आहे. त्यांच्याकडून चोरीची स्कूटी आणि गुन्ह्यात वापरलेली दुचाकी जप्त करण्यात आली आहे.
स्थैर्य, फलटण, दि. 8 एप्रिल : फलटण शहरातील कसबा पेठ परिसरातून होंडा ॲक्टिव्हा स्कूटी चोरणाऱ्या दोन सराईत आरोपींना फलटण शहर पोलिसांनी गोपनीय माहितीच्या आधारे शिताफीने जेरबंद केले आहे. या आरोपींकडून चोरीला गेलेली स्कूटी आणि गुन्ह्यासाठी वापरलेली एक विना क्रमांकाची स्प्लेंडर मोटारसायकल असा मुद्देमाल हस्तगत करण्यात पोलिसांना मोठे यश आले आहे.
दिनांक २६ मार्च २०२६ च्या रात्री ११:३० ते २७ मार्चच्या सकाळी ७:०० वाजेच्या दरम्यान कसबा पेठ, ब्राह्मणगल्ली येथील अज्ञात चोरट्यांनी चोरून नेली होती. याप्रकरणी दिलेल्या तक्रारीवरून फलटण शहर पोलीस स्टेशनमध्ये भारतीय न्याय संहिता (BNS) कलम ३०३ (२) प्रमाणे गुन्हा (रजि. क्र. ११०/२०२६) दाखल करण्यात आला होता.
गोपनीय माहिती आणि आरोपींना अटक:
दाखल गुन्ह्याच्या तपासादरम्यान फलटण शहर पोलीस ठाण्याचे प्रभारी पोलीस निरीक्षक श्री. अरविंद काळे यांना गोपनीय खबऱ्यामार्फत महत्त्वाची माहिती मिळाली. या माहितीच्या आधारे गुन्हे प्रकटीकरण पथकाने तत्काळ शोध घेऊन दोन संशयित आरोपींना ताब्यात घेतले:
- यश संदीप ढालपे (वय २३ वर्षे, रा. शिवाजीनगर, गजानन चौक, फलटण)
- प्रफुल्ल चंद्रकांत हरीहर (वय २६ वर्षे, रा. मंगळवार पेठ, फलटण)
गुन्ह्याची कबुली आणि मुद्देमाल जप्त:
पोलिसांनी या दोन्ही आरोपींना अटक करून त्यांच्याकडे कौशल्यपूर्ण व कसून चौकशी केली असता, त्यांनी सदर ॲक्टिव्हा स्कूटी चोरी केल्याची स्पष्ट कबुली दिली. पोलिसांनी या आरोपींकडून चोरी केलेली ॲक्टिव्हा स्कूटी आणि हा गुन्हा करण्यासाठी वापरलेली एक ‘विना क्रमांकाची स्प्लेंडर मोटारसायकल’ जप्त केली आहे.
दोन्ही आरोपींना सन्माननीय न्यायालयात हजर केले असता, न्यायालयाने गुन्ह्याच्या अधिक तपासाकामी त्यांना ‘पोलीस कोठडी’ सुनावली आहे. या गुन्ह्याचा पुढील तपास महिला पोलीस हवालदार राणी फाळके (ब.नं. ७७३) या करत आहेत.
कारवाईतील पोलीस पथक:
सदरची धडक कारवाई सातारा जिल्ह्याचे पोलीस अधीक्षक श्री. तुषार दोशी, अपर पोलीस अधीक्षक डॉ. वैशाली कडुकर आणि फलटणचे उपविभागीय पोलीस अधिकारी श्री. विशाल खांबे यांच्या मार्गदर्शनाखाली फलटण शहर पोलीस ठाण्याचे प्रभारी पोलीस निरीक्षक श्री. अरविंद काळे व त्यांच्या गुन्हे प्रकटीकरण पथकातील पो.हवा. संतोष नाळे, मुकेश घोरपडे, अतुल बडे आणि म.पो.हवा. राणी फाळके यांनी यशस्वीपणे पूर्ण केली.
