फडतरवाडी जिल्हा परिषद शाळेची परसबाग तालुक्यात अव्वल; पोषण आहारात ताज्या भाज्यांचा समावेश
स्थैर्य, फलटण, दि. २० ऑक्टोबर : विद्यार्थ्यांच्या सर्वांगीण विकासाचा भाग म्हणून सातारा जिल्हा परिषदेमार्फत राबवण्यात येणाऱ्या ‘शालेय पोषण आहार परसबाग’ उपक्रमात, फडतरवाडी जिल्हा परिषद शाळेने फलटण तालुक्यात प्रथम क्रमांक पटकावला आहे. शिक्षक आणि विद्यार्थ्यांच्या एकत्रित प्रयत्नातून फुलवलेल्या या परसबागेतील ताज्या भाज्यांचा आता थेट शाळेच्या पोषण आहारात नियमितपणे वापर केला जात आहे.
सातारा जिल्हा परिषद शाळांमध्ये शालेय पोषण आहारांतर्गत विविध उपक्रम राबवले जातात. त्यापैकीच एक महत्त्वाचा उपक्रम म्हणजे शाळेच्या आवारात परसबाग तयार करणे. सन २०२५-२६ या शैक्षणिक वर्षासाठी आयोजित करण्यात आलेल्या परसबाग स्पर्धेत फडतरवाडी शाळेने हिरिरीने सहभाग घेतला होता. फलटण पंचायत समिती स्तरावर झालेल्या या स्पर्धेत शाळेने उत्कृष्ट कामगिरी करत तालुक्यात पहिला क्रमांक मिळवला.
शाळेचे वरिष्ठ मुख्याध्यापक एम.डी. गायकवाड यांच्या मार्गदर्शनाखाली शाळेतील सर्व शिक्षक आणि विद्यार्थ्यांनी एकत्रितपणे श्रमदान करून ही सुंदर परसबाग साकारली आहे. या परसबागेत केवळ शोभेची झाडे न लावता, पोषण आहारात आवश्यक असलेल्या भाज्यांवर विशेष लक्ष केंद्रित करण्यात आले आहे. फळभाज्या, पालेभाज्या, विविध प्रकारची फळे आणि औषधी वनस्पती यांचे वेगवेगळे विभाग तयार करण्यात आले आहेत.
या परसबागेतील ताज्या आणि रसायनमुक्त भाजीपाल्याचा वापर शाळेतील विद्यार्थ्यांसाठी तयार होणाऱ्या मध्यान्ह भोजनात नियमितपणे केला जातो. यामुळे विद्यार्थ्यांना अधिक सकस आणि पौष्टिक आहार मिळण्यास मदत होत आहे. या उपक्रमातून विद्यार्थ्यांना शेतीचे महत्त्व आणि श्रमप्रतिष्ठेचे धडेही मिळत आहेत.
या यशामागे मुख्याध्यापक गायकवाड यांच्यासह शाळेतील शिक्षक छाया जाधव, संजय जगदाळे, जयश्री चव्हाण, रोहन दळवे, आशा वाघमारे, निकिता फडतरे आणि विशेषतः इयत्ता सहावी व सातवीच्या विद्यार्थ्यांचे मोठे कष्ट आहेत. त्यांच्या एकत्रित प्रयत्नांमुळेच ही परसबाग स्पर्धेत अव्वल ठरली.
या उपक्रमासाठी फडतरवाडी गावच्या सरपंच पौर्णिमा काटे, उपसरपंच अमोल फडतरे, अनुराज नलवडे, शाळा व्यवस्थापन समितीचे अध्यक्ष दीपक दिवसे, उपाध्यक्षा सुजाता कर्वे आणि समितीच्या सर्व सदस्यांचे मोलाचे सहकार्य लाभले.
फलटण पंचायत समितीचे गटशिक्षणाधिकारी मठपती, शिक्षण विस्तार अधिकारी पारसे, केंद्रप्रमुख सोमनाथ लोखंडे आणि दमयंती कुंभार यांनी शाळेचे मुख्याध्यापक, शिक्षक, विद्यार्थी आणि शाळा व्यवस्थापन समितीचे अभिनंदन करून पुढील वाटचालीस शुभेच्छा दिल्या आहेत.
