कांदा-बटाट्याच्या गोण्यांचे वजन आता ५० किलोपर्यंतच; राज्य सरकारचा माथाडी कामगारांसाठी मोठा निर्णय
थेट WhatsApp वर मिळवा
बाजार समित्यांमधील माथाडी कामगारांच्या आरोग्याची काळजी घेत राज्य सरकारने कांदा, बटाटा व इतर शेतमालाच्या गोण्यांचे कमाल वजन ५० किलो निश्चित करत महत्त्वाचा शासन निर्णय जारी केला आहे.
स्थैर्य, सातारा, दि. २० ऑक्टोबर : महाराष्ट्रातील बाजार समित्यांमध्ये हमाल आणि माथाडी कामगारांना प्रमाणापेक्षा अधिक वजन उचलावे लागू नये, यासाठी राज्य सरकारने एक मोठा निर्णय घेतला आहे. या निर्णयानुसार आता कांदा, बटाटा व इतर शेतमालाच्या गोण्यांचे कमाल वजन ५० किलोपर्यंतच ठेवण्याची सक्ती करण्यात आली आहे. केंद्र सरकारच्या निर्देशानंतर राज्य शासनाच्या संबंधित विभागाने याबाबतचा सविस्तर शासन निर्णय (जीआर) जारी केला आहे.
माथाडी कामगारांच्या आरोग्याला प्राधान्य
बाजार समित्यांमध्ये शेतमालाच्या गोण्यांची भरलाई, उतरलाई करताना कामगारांना शेकडो किलोचे ओझे उचलावे लागत असे. अतिजड गोण्यांमुळे कामगारांच्या आरोग्यावर गंभीर परिणाम होत असून पाठदुखी आणि मणक्याचे आजार जडत असल्याच्या तक्रारी वारंवार समोर येत होत्या. या पार्श्वभूमीवर कामगारांच्या सुरक्षिततेला आणि आरोग्याला प्राधान्य देत सरकारने गोण्यांच्या वजनावर ५० किलोची कायदेशीर मर्यादा आणली आहे. या नियमाची कडक अंमलबजावणी करण्याचे निर्देश सर्व बाजार समित्यांना देण्यात आले आहेत.
कडक अंमलबजावणीचे निर्देश
नवीन नियमानुसार कोणत्याही बाजार समितीत ५० किलोपेक्षा अधिक वजनाच्या गोण्या आणण्यास किंवा भरण्यास मज्जाव करण्यात आला आहे. सह आयुक्त (माथाडी) यांनी यासंदर्भातील सर्व माथाडी मंडळांचा अहवाल वेळोवेळी शासनाला सादर करावा, असेही शासन निर्णयात स्पष्ट करण्यात आले आहे. या निर्णयामुळे राज्यातील हजारो माथाडी कामगारांना मोठा दिलासा मिळाला असून बाजार घटकांमध्ये याचे स्वागत होत आहे.
