गंभीर आजारांच्या उपचारासाठी सीएसआर निधी मिळवण्याचा मार्ग सुकर; राज्य सरकारचा नवा निर्णय
थेट WhatsApp वर मिळवा
दुर्धर आजारांवरील उपचारांसाठी गरजू रुग्णांना आर्थिक आधार मिळावा यासाठी राज्य सरकारने ‘महाराष्ट्र पब्लिक रिलीफ सोसायटी’ स्थापन करण्याचा महत्त्वाचा निर्णय घेतला आहे.
स्थैर्य, सातारा, दि. ०४ नोव्हेंबर : कर्करोग आणि हृदयविकारासारख्या गंभीर आजारांनी ग्रस्त असलेल्या गरजू रुग्णांना आर्थिक मदत पुरवण्यासाठी आणि आपत्कालीन परिस्थितीचा सामना करण्यासाठी राज्य सरकारने ‘महाराष्ट्र पब्लिक रिलीफ सोसायटी’ स्थापन करण्याचा महत्त्वपूर्ण निर्णय घेतला आहे. या नवीन सोसायटीमुळे कॉर्पोरेट क्षेत्रातील सामाजिक दायित्व निधी (सीएसआर) थेट गरजू रुग्णांच्या उपचारासाठी उपलब्ध होण्याचा मार्ग सुकर झाला आहे.
उच्चस्तरीय कार्यकारिणी आणि व्यवस्थापन
या सोसायटीच्या अध्यक्षपदी स्वतः मुख्यमंत्री देवेंद्र फडणवीस असणार आहेत. याशिवाय मुख्य सचिव, सामान्य प्रशासन विभागाचे प्रधान सचिव, सार्वजनिक आरोग्य व वैद्यकीय शिक्षण विभागाचे सचिव आणि वित्त विभागाचे प्रतिनिधी या कार्यकारिणी मंडळात समाविष्ट असतील. या सोसायटीचे मुख्य कार्यालय मंत्रालयातील मुख्यमंत्री सचिवालयात कार्यरत राहणार आहे.
आरोग्य शिबिरे आणि आपत्कालीन मदत
केवळ वैयक्तिक वैद्यकीय उपचारांपुरते मर्यादित न राहता, या सोसायटीच्या माध्यमातून आपत्कालीन परिस्थितीतील मदत कार्ये, आरोग्यविषयक जनजागृती उपक्रम आणि अन्न व वस्त्र वाटपासारखे सामाजिक प्रकल्प देखील राबवले जाणार आहेत. या निर्णयामुळे मुख्यमंत्री सहायता निधीचा विस्तार होऊन सर्वसामान्य नागरिकांना मोठा दिलासा मिळणार आहे.
