पवारवाडी ता. फलटण येथे १५ लाख ८५ हजारांचा ऐवज लंपास
स्थैर्य, फलटण, दि. २०: रहात्या घराच्या पाठी मागील दरवाजातून घरात प्रवेश करुन कपाटात ठेवलेले सोन्याचे दागीने व चार लाख रुपयांची रोकड असा एकूण पंधरा लाख ८५ हजारांचा ऐवज आज्ञात चोरट्यांनी पळवून नेल्याची घटना पवारवाडी ता. फलटण येथे घडली आहे.
याबाबत ग्रामीण पोलिस ठाण्यातुन मिळालेली माहिती अशी की, सोमवार दि. १९ एप्रिल रोजी मध्यरात्री दिड ते पहाटे साडे पाचवाजण्याच्या सुमारास पवारवाडी ता. फलटण येथील चंद्रकांत दत्ताजीराव पवार यांच्या रहात्या घराच्या पाठीमागील बाजुच्या किचनरुम शेजारील खोलीच्या दरवाजाचा कडीकोयंडा काढून आत प्रवेश करुन आज्ञात चोरट्यांनी घरात प्रवेश केला. कपाटवर ठेवलेल्या कपाटाच्या चावीने कपाट उघडून कपाटात ठेवलेल्या वेगवेगळ्या तीन पर्समधील सोन्याचे दागीने व चार लाख रुपयांची रोख रक्कम असा एकूण पंधरा लाख ८५ हजार रुपयांचा ऐवज लंपास केला. याबाबत चंद्रकांत पवार यांनी फिर्याद दिली असून पुढील तपास ग्रामीण पोलिस ठाण्याचे पोलिस निरीक्षक नितिन सावंत करीत आहेत.
