स्व.रघुनाथराव दौलतराव पाटील उर्फ आर.डी.यांचे सहकार क्षेत्रासाठी प्रेरणादायी कार्य
स्थैर्य, सातारा, दि. ०१ : सातारा जिल्हा मध्यवर्ती सहकारी बँकेचे संस्थापक व माजी अध्यक्ष स्व .रघुनाथराव दौलतराव पाटील उर्फ आर .डी .पाटील यांची जयंती बँकेचे मुख्य कार्यालय, नवीन प्रशासकीय इमारत, सातारा येथे संपन्न झाली.
या प्रसंगी बँकेचे मुख्य कार्यकारी अधिकारी डॉ. राजेंद्र सरकाळे म्हणाले स्व. आर.डी.पाटील यांचे सातारा जिल्हयाचे सर्वांगीण विकासासाठी, जिल्हयातील प्रत्येक तळागाळातील घटकांचा, सहकारी संस्थांचा, सहकार चळवळीचा तसेच औद्योगिक प्रगती होणेसाठी तसेच सातारा जिल्हा बॅंकेची उभारणी आणि प्रगतीमध्ये अत्यंत मोलाचे योगदान आहे. त्यांचे कार्य सहकार क्षेत्रांमध्ये कार्य करणा-या सर्वांना प्रेरणादायी असून सहकारी बॅंकिग क्षेत्रात त्यांचे काम दीपस्तंभा सारखे आहे.
आर.डी .पाटील यांनी सातारा जिल्हा मध्यवर्ती बँकचे दुसरे अध्यक्ष म्हणून सलग १७ वर्षे यशस्वी कामकाज केले. स्व. रघुनाथराव पाटील यांचे व्यक्तीमत्व निस्वार्थी आणि निष्कलंक होते. सन १९४७-४८ मध्ये कराड तालुका खरेदी विक्री संघाचे अध्यक्ष, जिल्हा बॅंकेचे सतत १७ वर्षे अध्यक्ष, महाराष्ट्र राज्य मार्केटिंग फेडरेशनचे अध्यक्ष व उपाध्यक्ष, महाराष्ट्र राज्य सहकारी बॅंकेचे उपाध्यक्ष व संचालक, महाराष्ट्र राज्य सहकारी दूध संघ लि.पुणे अध्यक्ष, कोयना सह .दूध प्रक्रिया संघ या संस्थेचे अध्यक्षपद अशी रघुनाथराव पाटील यांची यशस्वी कारकीर्द आहे.
या बँकेला सुरुवातीपासूनच यशवंतराव चव्हाण, आर. डी. पाटील, आबासाहेब वीर इत्यादी नेत्यांचे दूरदृष्टीचे नेतृत्व लाभलेमुळे बँकेची देदीप्यमान प्रगती झाली आहे. सातारा जिल्हा मध्यवर्ती बँक ग्रामीण भागातील तळागाळातील सर्वसामान्य शेतकरी सभासदांपर्यंत पोहोचली असून जिल्हयामध्ये ३२० शाखांच्या माध्यमातून ग्राहकांना अत्याधुनिक बँकिंगच्या सुविधा देत आहे. चालू वर्षात कोरोनाच्या पार्श्वभूमीवर सातारा जिल्हा मध्यवर्ती सहकारी बँकेने जिल्ह्यातील गरजू कुटुंबाना उदरनिर्वाहासाठी जीवनावश्यक अन्नधान्याचे तसेच मुख्यमंत्री सहाय्यता निधीसही रक्कम रु. १ कोटी व संचालक मंडळ सदस्यांचा सभाभत्ता व बँक अधिकारी/सेवक यांचे १ दिवसाचे वेतन रक्कम रु.१६ लाखाची मदत मुख्यमंत्री सहाय्यता निधीस करून सामाजिक बांधिलकी जोपासली आहे.
या प्रसंगी बँकेचे सरव्यवस्थापक राजीव गाढवे, राजेंद्र भिलारे, विविध विभागांचे व्यवस्थापक, उपव्यवस्थापक, विभागप्रमुख, अधिकारी व सेवक यांनी स्व .रघुनाथराव दौलतराव पाटील यांचे प्रतिमेस फुले वाहून विनम्र अभिवादन केले.
