निरगुडीत काविळीचा उद्रेक; गोरे आळीत १०-१२ रुग्ण, दुषित पाण्याचा संशय

निरगुडी गावात गेल्या महिनाभरापासून काविळीची साथ पसरली असून गोरे आळीत १०-१२ रुग्ण आढळले आहेत. आमदार सचिन पाटील यांच्या आदेशानंतर आरोग्य यंत्रणा अलर्ट मोडवर आली आहे. वाचा सविस्तर.

स्थैर्य, फलटण, दि. 12 डिसेंबर : फलटण तालुक्यातील निरगुडी गावात गेल्या महिनाभरापासून काविळीची (Jaundice) साथ पसरली आहे. विशेषतः गोरे आळी (महात्मा फुले नगर) परिसरात १० ते १२ रुग्ण आढळून आल्याने खळबळ उडाली आहे. ग्रामपंचायतीकडून होणाऱ्या दुषित पाणीपुरवठ्यामुळे हा आजार बळावल्याचा संशय नागरिकांनी व्यक्त केला असून, आमदार सचिन पाटील यांच्या सूचनेनंतर आरोग्य यंत्रणा खडबडून जागी झाली आहे.

नेमकी परिस्थिती काय?

निरगुडी गावात अचानक काविळीचे रुग्ण वाढू लागले आहेत. गोरे आळीत एकाच वेळी १० ते १२ रुग्ण सापडल्याने नागरिकांमध्ये भीतीचे वातावरण आहे. ग्रामपंचायतीमार्फत केला जाणारा पाणीपुरवठा अशुद्ध असल्यामुळेच ही साथ पसरली असावी, अशी दाट शंका स्थानिक नागरिक व्यक्त करत आहेत.

आमदारांचा तातडीने हस्तक्षेप

गावातील या गंभीर परिस्थितीची माहिती सामाजिक कार्यकर्ते महेंद्र गोरे यांनी आमदार सचिन पाटील यांना दूरध्वनीवरून दिली. घटनेचे गांभीर्य ओळखून आमदार पाटील यांनी तात्काळ गटविकास अधिकाऱ्यांना (BDO) संपर्क साधला आणि सर्व शासकीय यंत्रणांना तातडीने गावात पाठवून उपाययोजना करण्याच्या सूचना दिल्या.

‘मेडिक्लोअर’ वाटप पुन्हा सुरू करण्याची मागणी

पूर्वी ग्रामपंचायतीकडून पाणी शुद्धीकरणासाठी प्रत्येक कुटुंबाला ‘मेडिक्लोअर’चे वाटप केले जात असे. मात्र, गेल्या अनेक वर्षांपासून हे वाटप बंद आहे. ते तात्काळ सुरू करावे आणि गावाला होणाऱ्या पाणीपुरवठ्याची सखोल तपासणी करावी, अशा मागणीचे निवेदन गटविकास अधिकाऱ्यांना देण्यात आले. यानंतर तालुक्यातील आरोग्य यंत्रणा कामाला लागली आहे.

प्रशासनाची प्रतिक्रिया

याविषयी माहिती देताना तालुका आरोग्य अधिकारी संतोष कोंडके म्हणाले,

“पाण्याच्या स्त्रोताचे नमुने गोळा करून ते तपासणीसाठी खंडाळा येथे पाठवण्यात आले आहेत. याबाबतीत लवकरच अहवाल प्राप्त होईल. तोपर्यंत आरोग्य विभागाने आवश्यक त्या उपाययोजना सुरू केल्या आहेत.”

उपस्थिती

यावेळी देवराज गोरे, लहु गोरे, अजित गोरे, अभिजित गोरे यांच्यासह ग्रामस्थ उपस्थित होते.