गोखळी येथे १० फेब्रुवारीला विकासकामांचे उद्घाटन व कापूस उत्पादकांसाठी शेतकरी मेळावा
दैनिक स्थैर्य | दि. ०८ फेब्रुवारी २०२३ | गोखळी |
गोखळी, ता. फलटण येथील विकासकामे ग्रामपंचायत कार्यालय व पिण्याच्या पाण्याच्या टाकीचे उद्घाटन तसेच पूर्व भागातील शेतकर्‍यांसाठी कापूस उत्पादक शेतकरी मेळावा शुक्रवार, दि. १० फेब्रुवारी रोजी सायंकाळी ५.०० वाजता आयोजित केला आहे. विधान परिषदेचे माजी सभापती व विद्यमान आमदार श्रीमंत रामराजे नाईक निंबाळकर यांच्या हस्ते या विकासकामांचे उद्घाटन होणार असून यावेळी ते कापूस उत्पादक शेतकर्‍यांना मार्गदर्शन करणार आहेत.
या कार्यक्रमाचे अध्यक्षस्थान आमदार दीपकराव चव्हाण भूषविणार असून कृषी उत्पन्न बाजार समितीचे सभापती माजी श्रीमंत रघुनाथराजे नाईक निंबाळकर, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, जिल्हा परिषदेच्या माजी सदस्या श्रीमंत सौ. शिवांजलीराजे नाईक निंबाळकर, जिल्हा मध्यवर्ती सहकारी बँकेचे संचालक श्रीमंत शिवरूपराजे खर्डेकर, फलटण पंचायत समितीचे माजी सभापती श्रीमंत विश्वजितराजे नाईक निंबाळक़र, श्रीराम साखर कारखान्याचे माजी चेअरमन महादेवराव पवार यांची यावेळी प्रमुख उपस्थिती असणार आहे.
या कार्यक्रमांसाठी तालुक्यातील पूर्व भागातील शेतकरी, जनतेने मोठ्या संख्येने उपस्थित रहावे, असे आवाहन गोखळीच्या सरपंच सौ. सुमनताई गावडे, उपसरपंच सागर गावडे व ग्रामपंचायत सदस्य व ग्रामस्थांनी केले आहे.
