“मी शांत आहे, पण आडवा येणाऱ्याला…!”; एकनाथ शिंदेंचा विरोधकांना इशारा; भरसभेतून ‘फोन’ फिरवत आरोग्य आणि उद्योग मंत्र्यांना दिले आदेश!

• फलटणमध्ये शिवसेनेचा यळकोट! अनिकेतराजेंसाठी उपमुख्यमंत्र्यांची तोफ धडाडली

• १०० बेडचे रुग्णालय आणि एमआयडीसी विस्तारासाठी भरसभेतून मंत्र्यांना थेट फोन

• “माझ्याकडे सगळ्यांची अंडीपिल्ली आहेत”; शिंदेंचा विरोधकांना सज्जड दम

• रामराजेंची भावनिक साद तर रघुनाथराजेंचा विरोधकांवर हल्लाबोल

स्थैर्य, फलटण, दि. 29 नोव्हेंबर : “मी स्वभावाने शांत आहे, पण कुणी आडवा आला तर त्याला आडवा केल्याशिवाय राहत नाही. माझ्याकडे सगळ्यांची अंडीपिल्ली आहेत. कार्यकर्त्यांवर अन्याय झाल्यास किंवा खोटे गुन्हे दाखल केल्यास गाठ माझ्याशी आहे,” असा सज्जड इशारा उपमुख्यमंत्री एकनाथ शिंदे यांनी विरोधकांना दिला.

फलटण नगरपरिषदेच्या निवडणुकीच्या पार्श्वभूमीवर शिवसेनेचे उमेदवार अनिकेतराजे नाईक निंबाळकर यांच्या प्रचारार्थ आयोजित भव्य जाहीर सभेत ते बोलत होते. यावेळी त्यांनी विधान परिषदेचे माजी सभापती रामराजे नाईक निंबाळकर, पालकमंत्री शंभूराज देसाई, आमदार महेश शिंदे, संजीवराजे नाईक निंबाळकर, रघुनाथराजे नाईक निंबाळकर आणि माजी आमदार दीपक चव्हाण यांच्या उपस्थितीत फलटणच्या विकासाचा रोडमॅप मांडला.

भरसभेत ‘ॲक्शन मोड’; मंत्र्यांना थेट फोन

भाषणादरम्यान रामराजेंनी मांडलेल्या मागण्यांची मुख्यमंत्र्यांनी तत्काळ दखल घेतली. त्यांनी भरसभेतूनच भ्रमणध्वनीवरून संबंधित मंत्र्यांना संपर्क साधत उपस्थितांना सुखद धक्का दिला.

• १०० बेडचे रुग्णालय: फलटणच्या ५० बेडच्या उपजिल्हा रुग्णालयाचे १०० बेडमध्ये रूपांतर करण्यासाठी त्यांनी आरोग्य मंत्री यांना फोन लावला. “फलटणमध्ये रामराजे आणि हजारो नागरिक समोर आहेत. रुग्णालयाचे काम तातडीने मार्गी लावा,” अशा सूचना त्यांनी दिल्या.

  

• एमआयडीसी विस्तार: फलटण एमआयडीसीच्या विस्तारासाठी ५०० एकर जागा अधिग्रहित करण्याबाबत त्यांनी उद्योग मंत्री उदय सामंत यांच्याशी संपर्क साधून संयुक्त बैठक घेण्याचे निर्देश दिले.

  

“रामराजेंचा निर्णय स्वाभिमानासाठी”

उपमुख्यमंत्री शिंदे म्हणाले, “फलटणच्या विकासासाठी आणि जनतेच्या स्वाभिमानासाठी रामराजे नाईक निंबाळकर यांनी राजकीय अभिनिवेश बाजूला ठेवून शिवसेनेसोबत येण्याचा धाडसी निर्णय घेतला आहे. आता फलटणमध्ये शिवसेनेचा भगवा डौलाने फडकणार असून, अनिकेतराजेंच्या नेतृत्वाखाली शहराचा चेहरामोहरा बदलून टाकू.”

रामराजेंची भावनिक साद

यावेळी रामराजे नाईक निंबाळकर यांनी आपली भूमिका स्पष्ट केली. “माझ्या घराला आणि मुलांना सुरक्षित ठेवा, यापलीकडे माझी काहीच अपेक्षा नाही. जिल्ह्याची संस्कृती बिघडवण्याचे काम काही लोक करत आहेत, त्यांना रोखण्यासाठी आणि जिल्ह्याची घडी पुन्हा बसवण्यासाठी आम्ही तुमच्यासोबत आलो आहोत,” अशी भावनिक साद त्यांनी घातली.

अनिकेतराजे ‘पप्पू’ नव्हे, तर…

विरोधकांचा समाचार घेताना रघुनाथराजे नाईक निंबाळकर म्हणाले, “अनिकेतराजेंना ‘पप्पू’ म्हणणाऱ्यांनी लक्षात ठेवावे की, साखरवाडी कारखान्याला एनसीएलटीतून (NCLT) बाहेर काढून दत्त इंडियाला देणारा हाच वकील आहे. फलटणमध्ये प्रशासकीय दहशत पुन्हा निर्माण झाली, तर अनिकेतराजे काळा कोट घालून उभे राहतील.”

विकासाचा रोडमॅप आणि डॉ. मुंडे प्रकरण

आचारसंहिता संपताच शहराचे रस्ते चकाचक करू, झोपडपट्टीवासीयांना एसआरए (SRA) योजनेतून पक्की घरे देऊ आणि वाहतूक कोंडी सोडवण्यासाठी उड्डाणपूल उभारू, असे आश्वासन शिंदेंनी दिले. तसेच, “डॉ. मुंडे मृत्यू प्रकरणात दोषींना सोडणार नाही, मग ते प्रत्यक्ष असो वा अप्रत्यक्ष,” अशी ग्वाही त्यांनी दिली.